Shetelde júrgen otandastarymyzdyń 45 paıyzy referendýmda daýys berdi

NUR-SULTAN. QazAqparat – Shetelde júrgen 5 100 otandasymyz referendýmda daýys berip úlgerdi. Bul týraly QR Syrtqy ister mınıstriniń orynbasary Roman Vasılenko aıtty, dep habarlaıdy QazAqparat tilshisi.

«Qazirgi ýaqytta shet elderde referendým tynysh ári jumys jaǵdaıynda ótip jatyr. Nur-Sultan qalasynyń ýaqytymen saǵat 19.00-de shetelderde shamamen 5 100 otandasymyz daýys berip úlgerdi. Bul - tizimge engizilgen saılaýshylar sanynyń 45 paıyzy. Ýaqyt aıyrmashylyǵyn eskerer bolsaq, barlyq 65 ýchaske ashyldy. Sonymen qatar Azııa bóliginde ornalasqan Qytaı, Koreıa, Japonııa syndy elderde jáne basqa da ýchaskeler jumysyn aıaqtap, daýystardy sanaýǵa kiristi. Olardyń keıbirinde saılaýshylar 100 paıyz keldi», - dedi Roman Vasılenko Ortalyq referendým komıssııasy alańynda ótken brıfıng barysynda.

Onyń atap ótýinshe, Vashıngton, Nıý-Iork, Ottava qalalarynda jáne Brazılııada ornalasqan referendým ýchaskeleri osydan 2 saǵat buryn ǵana ashyldy.

Onda daýys berý 9 saǵatqa sozylady.

«Daýys berý nátıjeleri shyǵarylǵannan keıin qorytyndy qujattar jedel túrde Syrtqy ister mınıstrligine Esil aýdandyq saılaý komıssııasyna tapsyrý úshin jetkiziledi. Sheteldegi barlyq saılaý ýchaskeleri osy aýdanǵa tirkelgen. Referendým kúninde shetelde daýys berýshilerdiń tizimine 11 350 azamatymyz engizilgen», - dedi ol.

Aıta keteıik, QR Syrtqy ister mınıstrliginiń 52 shet memlekettegi Elshilikteriniń janynan 65 referendým ýchaskesi ashylǵan.