«Shetelde jumysqa ornalastyramyn»: 80 adamdy aldaǵan alaıaq qamaýǵa alyndy
ASTANA. KAZINFORM — Kúdikti vıza alý, medıtsınalyq saqtandyrý, bıometrııalyq rásimder jáne basqa da qyzmetterdi alyp beremin degen jeleýimen azamattardan 40 mıllıon teńgege jýyq aqsha alǵan.
Oblystyq polıtsııa departamenti baspasóz qyzmetiniń málimetinshe, Kókshetaý qalasynda shetelde jumysqa ornalastyrý qyzmetin kórsetýge baılanysty alaıaqtyq faktisi boıynsha qylmystyq isti tergelip jatyr.
— Sotqa deıingi tergeý barysynda Kókshetaý qalasynyń turǵyny 2023 jyldan bastap 2026 jylǵy qańtarǵa deıin «Instagram» áleýmettik jelisi arqyly azamattarǵa Ulybrıtanııanyń Birikken Koroldigine jumysqa ornalasý boıynsha aqyly qyzmetter usynǵany anyqtaldy. Kúdikti vıza alý, medıtsınalyq saqtandyrý, bıometrııalyq rásim jáne basqa da ilespe qyzmetterden ótý syltaýymen azamattardan qarajat alǵan. Alaıda, is júzinde eshqandaı jumyspen qamtý sharasy qabyldanbaǵan. Ol qarjyny qolma-qol da, banktik aýdarym arqyly da alǵan, — delingen habarlamada.
Búgingi tańda 80-ge jýyq adamnyń zardap shekkeni anyqtaldy. Keltirilgen shyǵynnyń jalpy somasy shamamen 40 mıllıon teńge. Qazir kúdikti úıqamaqqa alyndy.
Polıtsııa qyzmetkerleri azamattarǵa shetelde jumys izdeý kezinde saq bolýǵa jáne alaıaqtyqtyń birneshe aıqyn belgilerine nazar aýdarýǵa shaqyrdy. Oǵan mynalar jatady:
- «Kepildendirilgen» jumysty qamtamasyz etý úshin tolyq nemese kóp somada aldyn ala tólem talap etý;
- Deldaldyń resmı tirkeýi nemese lıtsenzııasynyń bolmaýy;
- Vıza nemese basqa qujattardy resmı organdardyń qatysýynsyz, deldal arqyly rásimdeýdi usyný;
- Kelissózder tek áleýmettik jeliler men messendjerler arqyly júrgizý;
- Qyzmet úshin tólem jasaý jáne sheshimdi jyldam qabyldaýǵa qysym jasaý.
Buǵan deıin Aqmola oblysynyń turǵyny jalǵan ınternet jeńildigine aldanyp, 5 mln teńgesinen qaǵylǵan bolatyn.
