Shetelde tyıym salynǵan «shóptik mıkster» Qazaqstanda ashyq saýdalanýda - B. Bekjanov
ASTANA. Qańtardyń 13-i. QazAqparat /Qanat Mámetqazyuly/ - Shetelde tyıym salynǵan «shóptik mıkster» Qazaqstanda ashyq saýdalanýda.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Berik Bekjanov osylaı málim etti, dep habarlaıdy QazAqparat.
«2009 jyldyń qazanynda elimizde arnaıy «shóptik mıkster» erkin saýda aınalymynda júrgendigi týraly depýtattyq saýalmen QR Bas prokýratýrasyna jáne Densaýlyq saqtaý mınıstrligine júgingen bolatynmyn. Osy organdardan Qazaqstanda bular esirtki zattaryna jatqyzylmaǵany jáne tyıym salynbaǵany týraly aqparat alyndy. Toqtala ketetin jaıt, kórshiles Reseı «shóptik mıksterdi», áser etý kúshi basqa esirtki zattarynan kem emes, adamnyń sanasyn ýlaıtyn úlken qaýip dep dabyl qaǵyp otyr. Óıtkeni, Reseıdiń 20-ǵa jýyq óńirinde atalǵan shóptik qospany satý men paıdalaný shekti jaǵdaıǵa jetip, ásirese jastardyń buǵan áýes bolýy keń etek alǵan. Sol sebepten bolýy kerek, Reseı ótken jyldyń sáýir aıynan bastap «shóptik mıksterdiń» erkin saýda aınalymyna qatań qadaǵalaý ornatyp, buny esirtki zattary qataryna jatqyzý týraly máseleni qarastyryp jatyr», dedi depýtat.
Onyń aıtýynsha, qazirgi tańda atalǵan shóp qospalary Almaty qalasynyń qaq ortasynda dúkende ashyq saýdalanady. Buǵan qosa, atalǵan shóptik qospanyń qorabyndaǵy qazaq tilindegi jazbasynda «shóp mıksteri adam tánin emes, janyn emdeıdi» dep jazylypty.
«Bir qaraǵanda qarapaıym shóptik dáriler ispettes kórinetin qospalar áseri «marıhýanadan da» uzaq ári kúshti áser beretinin búginde reseılik mamandar dáleldep otyr. Sondaı-aq, osyndaı «shóptik qospalardyń» keri áserin túsingen Ulybrıtanııa, Frantsııa, Germanııa, Avstrııa, Shveıtsarııa, Japonııa, AQSh jáne taǵy sol sııaqty álemniń damyǵan elderi paıdalanýǵa múldem tyıym salǵan. Sebebi «qospa» táýeldilikke dýshar etetin, paıdalanǵan kezde adamdy esinen aıyratyn, óz áreketine jaýap bere almaıtyn halge jetkizetin, jalpy aıtqanda esirtki zatyn paıdalanýdyń saldaryna alyp keletin nátıjege soqtyrady», degen depýtat bundaı «shóptik qospanyń» ǵylymı saraptamasyn júrgizip, ony áser etý dárejesine saı esirtki zattary qataryna jatqyzý týraly resmı qorytyndy berý qajettigin atap ótti.
