Shetelde turyp ta zeınetaqy alýǵa bolady — Konstıtýtsııalyq Sot
ASTANA. KAZINFORM — Konstıtýtsııalyq Sot Qazaqstannan tys jerge turaqty turýǵa ketken azamattardyń zeınetaqy tólemderine qatysty máselelerdi túsindirdi.
Konstıtýtsııalyq Sot Shyǵys Qazaqstan oblystyq sotynyń Áleýmettik kodekstiń 196-baby 1-tarmaǵynyń, 202-baby 2-tarmaǵynyń, 204-baby 3-tarmaǵy 2) tarmaqshasynyń jáne zeınetaqymen qamsyzdandyrýdyń rásimdik máselelerin retteıtin, 2023 jylǵy 22 maýsymdaǵy № 232 Qaǵıdalardyń 5-tarmaǵy besinshi bóliginiń konstıtýtsııalylyǵyn tekserý týraly usynýyn qarady.
Usynys engizýge atalǵan normalardyń ózara baılanysta azamattyń memlekettik bazalyq zeınetaqy men jasyna baılanysty zeınetaqy tólemin taǵaıyndaý jáne alý quqyǵyn júzege asyrý úshin Qazaqstan aýmaǵynda turaqty turýy shart, al bul Konstıtýtsııanyń 14-baby men 28-babynyń 1-tarmaǵynyń erejelerine qaıshy keledi dep paıymdaǵan azamatshanyń ótinishi negiz boldy.
Konstıtýtsııalyq Sottyń ustanymy
— Usynylǵan materıaldardy zerdelep, Qazaqstan Respýblıkasynyń qoldanystaǵy quqyq normalaryn taldaǵannan keıin Konstıtýtsııalyq Sot zeınetaqy tólemderi óziniń quqyqtyq tabıǵaty boıynsha adamnyń turǵylyqty jerine emes, tap osy belgili bir jasqa tolýyna jáne soǵan qaraı áleýmettik osaldyǵynyń týyndaýyna baılanysty tólenetin tólem bolyp esepteledi, — delingen habarlamada.
Konstıtýtsııa normalaryn júıeli túsindirýdi negizge ala otyryp, Konstıtýtsııalyq Sot Kodekstiń 196-baby 1-tarmaǵynyń erejelerinde zeınetaqymen qamsyzdandyrýǵa zańdy quqyqtyń týyndaýy úshin el aýmaǵynda mindetti túrde turý shartynyń Qazaqstan Respýblıkasynyń azamattaryna belgilenýi kózdelmeıdi dep atap ótken.
— Kodekstiń 202-babynyń 2-tarmaǵynda jáne 204-baby 3-tarmaǵynyń 2) tarmaqshasynda jasyna baılanysty zeınetaqy tólemderin, memlekettik bazalyq zeınetaqy tólemin júzege asyrýdyń jalpy kezeńi jáne alýshynyń Qazaqstan Respýblıkasynyń sheginen tys jerge turaqty turýǵa ketý faktisi anyqtalǵan jaǵdaıda olardyń toqtatylýy aıqyndalady, — dep habarlady quzyrly organnan.
Kodekstiń osy erejelerinde atalǵan fakt zeınetaqy tólemderin taǵaıyndaý kezinde mundaı talap qoıylǵan adamdarǵa qatysty ǵana zańdyq mánge ıe jáne osy tólemderdiń toqtatylýyna ákep soǵady.
Konstıtýtsııalyq Sot Kodekstiń 202-baby 2-tarmaǵynyń jáne 204-baby 3-tarmaǵy 2) tarmaqshasynyń Konstıtýtsııa erejelerine sáıkes kelmeıtini belgili boldy.
— Qaǵıdalardyń 5-tarmaǵy besinshi bóliginiń daý aıtylyp otyrǵan erejeleri ótinish berýshiniń zań talaptaryna sáıkestigin rastaý tetigimen baılanysty jáne zeınetaqy taǵaıyndaýǵa tyıym salýlardy, shekteýlerdi qamtymaıdy, osyǵan baılanysty normatıvtik quqyqtyq aktini kórsetilip otyrǵan bóliginde Konstıtýtsııaǵa sáıkes kelmeıdi dep tanýǵa negizder joq. Ýákiletti memlekettik organǵa atalǵan aktige naqtylaý sıpatynda túzetýler engizý usynyldy, — delengen habarlamada.
Tekserý nátıjesi boıynsha Konstıtýtsııalyq Sot memlekettik bazalyq zeınetaqy tólemin jáne jasyna baılanysty zeınetaqy tólemin taǵaıyndaý jáne alý quqyǵyn iske asyrǵan kezde osy tólemderdi taǵaıyndaý úshin zańda belgilengen barlyq basqa sharttarǵa sáıkes kelgen Qazaqstan Respýblıkasynyń azamatyna Qazaqstan Respýblıkasynyń aýmaǵynda turaqty turý týraly talap qoıylmaıtynyn habarlady.
Eske sala keteıik, QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev zeınetaqy jınaǵynyń eń tómen jetkilikti shegin aıqyndaý ádistemesine ózgerister engizýge qatysty túsinik bergen bolatyn.
