Shetelde turatyn 92 qazaqstandyq ýaqytsha tirkeýdi rásimdedi

ASTANA. QazAqparat - 2017 jylǵy qańtarda eGov.kz portalynda úıden shyqpaı-aq turǵylyqty jeri boıynsha ýaqytsha tirkeý múmkindigi júzege asyrylǵan bolatyn. Bul qyzmet boıynsha bir jerge 1 aıdan 48 aıǵa deıin ýaqytsha tirkele alady, budan basqa turaqty mekenjaıy saqtalady.

Bul týraly «Ulttyq aqparattyq tehnologııalar» AQ baspasóz qyzmeti habarlaıdy.

«5 aqparattyq júıeniń («Jeke tulǵalar» MDQ, «Jyljymaıtyn múlik tirkelimi» MDQ, «Mekenjaı tirkelimi» AJ, «Halyqty qujattandyrý jáne tirkeý» Tirkeý pýnkti» AJ, «Elektrondyq úkimet portaly» AJ) ıntegratsııasynyń arqasynda qazirgi ýaqytta azamattar onlaın rejımde nebári 15 mınýt ishinde ýaqytsha tirkeý qyzmetin rásimdeı alady» delingen habarlamada.

2017 jyly elektrondyq úkimettiń portaly arqyly ýaqytsha tirkeýge barlyǵy 30 746 adam tirkelgen. Olardyń 48% - erler, 52% - áıelder. Atalǵan qyzmetti paıdalanǵan adamdardyń ishindegi eń jasy 16 jasar Astana qalasy Almaty aýdanynyń turǵyny. Al eresek adamdardyń osy qyzmetti paıdalanýshylardyń ishindegi eń jasy úlkeni - 94 jastaǵy qarııa bolyp shyqty (Almaty qalasy, Medeý aýdany). Munymen qosa 92 azamat shetelden Qazaqstandaǵy turǵylyqty jeri boıynsha ýaqytsha tirkeýdi rásimdegen.

Ýaqytsha tirkeý qyzmetin paıdalaný úshin aryz berýshi men turǵyn úı ıesiniń qoldaný kúshi bar (merzimi ótpegen) ETsQ bolýy jáne eGov.kz portalynda tirkelýi shart. Ýaqytsha tirkeýge turý qyzmeti «Azamattyq, kóshi-qon jáne kóship-kelý» bóliminiń «Halyqty tirkeý jáne tirkeý esebinen alyp tastaý» bólimshesinde qoljetimdi. Bólimshede kórsetilgen nysanda (formada) qajetti derekterdi durys toltyrý qajet. Qyzmet tegin. Ýaqytsha tirkeýge turý qyzmetiniń nátıjesin mekenjaı anyqtamasyn suratý arqyly tekserýge bolady.

Ýaqytsha tirkeý qyzmetin paıdalaný nusqaýlyǵy myna siltemede oranalasqan.