Shetelde tirkelgen avtolar jol-kólik oqıǵasyna jıi ushyraıdy - Aqtóbe polıtsııasy

AQTÓBE. QazAqparat – Aqtóbe oblystyq PD bastyǵy Abaı Júsipovtiń aıtýynsha, qazirgi kezde sheteldik nómiri bar kólik tizgindegender erejeni jıi buzady. Kóbiniń tehnıkalyq jaǵdaıy nashar, dep habarlaıdy QazAqparat tilshisi.

«Jyl basynan beri sheteldik esepte turǵan kólik júrgizýshileri 50 jol-kólik oqıǵasyna tap boldy. 18 adam qaza tapty. 90-nan astam adam aýrýhanaǵa jetkizildi. Máselen, Qostanaı-Qarabutaq jolyndaǵy Áıteke bı aýdanynyń mańynda jol apaty boldy. Armenııadan ákelingen jeńil kólik pen GAZel soqtyǵysyp, úsh adam kóz jumdy. Onyń bireýiniń jasy birde. Taǵy bir oqıǵa týraly aıtqym keledi. 18 shilde kúni Samara-Shymkent tas jolynda júrgizýshi rýlge ıe bola almaı, aýdarylyp qaldy», - dedi oblystyq PD bastyǵy Abaı Júsipov.

Jalpy, jazǵy demalys maýsymynda óńirde jol-kólik oqıǵasy jıilep ketti. Atap aıtqanda, jyl basynan beri 300-den astam jol-kólik oqıǵasy tirkelip, 400-den astam adam aýrýhanaǵa jatqyzyldy, 54 adam qaza tapty.

«Jazdyń eki aıynda 120 kólik oqıǵasy tirkelip, 25 adam kóz jumdy. Osy jol apattarynda 6 bala kóz jumdy. Sebebi belgili. Júrgizýshiler jol qozǵalysy erejesin saqtamaıdy. Qarsy jolaqqa shyǵyp ketetinderi kóp. Osy erejeni buzǵany úshin 7 adam kóz jumǵan. Jyldamdyqty asyratyndardyń kesirinen 37 adam mert boldy. Turǵyndardan qozǵalys erejesin saqtaýdy suraımyn. Jolda sharshaǵan jaǵdaıda ýaqtyly demalyp alǵan durys. Alys saparǵa shyqqan adam kóliktiń tehnıkalyq jaǵdaıyn bilip alýy kerek», - dedi oblystyq PD bastyǵy Abaı Júsipov.