Shetelde tanymal qazaqstandyq sýretshiler Astanaǵa jınaldy
ASTANA. QazAqparat - Shetelde tanymal bolǵan qazaqstandyq sýretshiler Astanaǵa keldi. Bul týraly búgin Ortalyq kommýnıkatsııalar qyzmetinde Astana Art Show sharasynyń ótkizilýine qatysty ótken baspasóz máslıhatynda málim boldy, dep habarlaıdy QazAqparat.
Atap aıtqanda, Astana Art Show zamanaýı Qazaqstannyń Beıneleý óneri Halyqaralyq Bıennalesiniń negizgi sharasy bolyp otyr jáne onyń aıasynda 15 qyrkúıek pen 28 qazan aralyǵynda úsh kórme ótedi. Bul kórmeler osyndaı formatta alǵash ret uıymdastyrylýda.
Astana Art Show kýratory Dına Baıtasovanyń sózine qaraǵanda, bul aýqymdy jobaǵa daıyndyq sharalary jarty jyl boıy júrgizildi. Sońǵy eki aptada Astanaǵa álem elderinen 50-ge jýyq sýretshi jınalyp jatyr. Atalǵan úsh kórmeniń birinshisi, ıaǵnı «Metamorphosis» taqyrybymen usynylǵan bul shara 15 qyrkúıekte ashylady. Joba qatysýshylary retinde shetelde esimderi tanymal bolǵan qazaqstandyq jas sýretshiler qamtylǵan. 21 sýretshi halyqaralyq iri kórmelerge qatysqan jáne shoýǵa arnaıy daıyndalǵan eńbekterin usynady.
«Osynda shaqyrylǵan sýretshilerdiń kóbi shetelde turyp jatyr. Olar shet memleketterde ózderiniń jumystaryn tabysty iske asyryp jatqan qandastarymyz. Atap aıtqanda, bul daryndy adamdardyń eńbekteri álem elderinde suranysqa ıe», - dedi D. Baıtasova.
Sýretter men ınstallıatsıalardy kelýshiler TSE Art Destination galereıasynda jáne onyń aınalasynda tamashalaı alady.
Budan bólek, bir aptadan keıin Ortalyq Azııa elderi men Qazaqstannyń 16 jas sýretshisiniń shyǵarmashylyǵyna arnalǵan «Qaıta júkteý. Keńistikti ońtaılandyrý» atty ekinshi kórme ótedi.
Sonymen qatar, Eýropalyq Odaqtyń uıymdastyrýymen «The Ghost Expedition» atty úshinshi kórme ashylady. Joba aıasynda qazaqstandyq jáne eýropalyq sýretshiler toby Mańǵystaý oblysynyń kıeli oryndaryn zertteý barysynda kórkem jumystarynyń nátıjelerin usynady.
Foto: www.ortcom.kz
