Shetelde suranysqa ıe qazaqstandyq taýarlar
ASTANA. QazAqparat - 2017 jyly saýda teńgerimi saldosy 71,7 paıyzǵa deıin artty. Bul týraly Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Syrtqy suranystyń qaıta jańǵyrýy jáne munaı jáne metaldardyń álemdik baǵalarynyń ósýi syrtqy sektordyń kórsetkishteriniń jaqsarýyna áserin tıgizdi. Aǵymdaǵy jylǵy 10 aıda eksporttyń ósimi (32,5%) ımport ósiminen (15,8%) shamamen eki ese basym bolýynyń nátıjesinde, saýda teńgerimi saldosy 71,7 paıyzǵa deıin artty. Saýda teńgeriminiń jaqsarýyna sondaı-aq óńdelgen ónim eksportynyń ósýi yqpal etti. Osylaısha, tamaq ónerkásibinde toń maılar jáne maılar, daıyn taǵamdyq maılary (86,2 paıyzǵa), qant jáne kondıterlik ónimder (55,4 paıyzǵa), astyq, astyq tuqymdastar, un, krahmal jáne sút, un ónimderinen jasalǵan daıyn taǵamdar (19,7 paıyzǵa) eksporty ulǵaıdy», -dep túsindirdi mınıstr.
T. Súleımenovtyń sózine qaraǵanda, jeńil ónerkásipte toqyma matalary jáne toqyma buıymdar eksporty 66,1 paıyzǵa, jún - 1,2 esege, maqta talshyǵy - 28,1 paıyzǵa ósti.
«Jalpy, eldiń syrtqy saýda aınalymy 25,6 paıyzǵa, ıaǵnı 62,1 mlrd AQSh dollaryna deıin ulǵaıdy», - deıdi vedomstvo basshysy.
