Shetelde sottalǵan Qazaqstan azamattarynyń kóbi qaı memlekette jazasyn ótep jatyr

ASTANA. KAZINFORM — QR Bas prokýrorynyń orynbasary Ǵalymjan Qoıgeldıev Qazaqstannyń bir myńǵa jýyq azamaty shetelde jazasyn ótep jatqanyn aıtty.

Búgin Senattyń jalpy otyrysynda depýtattar shetelde sottalǵan Qazaqstan azamattarynyń óz elinde jazasyn óteýge bas tartýy sebepterin surady.

Bul turǵyda Ǵ. Qoıgeldıev sottalǵan adamdy elimizge alyp kelý úshin onyń kelisimi bolýy kerek ekenin aıtty.

- Kelisimi bolmasa, ony májbúrlep ákele almaımyz. Ondaı mysaldar bizde bar. Qazir Qazaqstannyń 958 azamaty shetelde jazasyn ótep jatyr. Olardyń kóbi, ıaǵnı 700-den astamy Reseıde. Sonyń arasynda Qazaqstanda qalǵan jazasyn ótegisi kelmeıtinder bar. Sebebi, bul sottalǵandardyń sol elderde týystary men otbasy turyp jatyr, - dedi Bas prokýrordyń orynbasary.

Aıta keteıik, búgin Senattyń jalpy otyrysynda «Qazaqstan Respýblıkasy men Marokko Koroldigi arasyndaǵy sottalǵan adamdardy berý týraly kelisimdi ratıfıkatsııalaý týraly» Zańy maquldandy.