Shetelde sottalǵan qansha qazaqstandyq raqymshylyqqa iligedi
Aıta keteıik , búgin Senattyń jalpy otyrysynda «Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» Zańy qabyldandy.
«Ázirlengen zań jobasy qanshama otbasyny jaqyndarymen qaýyshtyrýǵa sebepker bolady. Degenmen, bul zań jobasynyń kúshi shet eldiń úkimimen sottalǵan, biraq elimizge ekstradıtsııalanǵan qazaqstandyq azamattarǵa qoldanyla ma? Qazirgi kezde elimizdiń túzeý mekemelerinde shet memleket sotynyń úkimimen sottalǵan 35 qazaqstandyq jazasyn ótep jatyr. Sol adamdardyń qanshasy Táýelsizdiktiń 30 jyldyǵyna baılanysty raqymshylyqtan úmitti», - dep surady senator Dana Nurjigitova.
Óz kezeginde Іshki ister mınıstri Erlan Turǵymbaev qazaqstandyq 35 adamnyń shetelde sottalǵanyn rastady. 31-i Reseıde isti bolsa, qalǵandary Belarýste jáne Qyrǵyzstanda sottalǵan.
«Kelisim boıynsha atalǵan 35 adamnyń barlyǵy Qazaqstanǵa aýystyrylyp, elimizde jazasyn ótep jatyr. Raqymshylyq boıynsha tek qana bir adam iligip otyr. Qalǵan 34 adam asa aýyr jáne aýyr qylmys úshin sottalǵan. Atalǵan bir adam tórt jylǵa aýyr qylmys úshin sottalǵan edi, sol merzimniń úsh jyly ótip, bir jyly qalǵan. Qujat boıynsha raqymshylyqqa enip otyr», - dedi mınıstr.
