Shetelde oqyp jatqan 400-den asa áskerı qyzmetshi QR Prezıdentiniń saılaýyna qatysty
Bul úshin on eldiń iri qalalarynda biryńǵaı saılaý ýchaskeleri uıymdastyrylǵan bolatyn. Mysaly, Tver, Rıazan, Smolensk, ıAroslavl, Krasnodar, Voronej, Kostroma qalalaryndaǵy áskerı joǵary oqý oryndarynyń kýrsanttary men tyńdaýshylary úshin biryńǵaı saılaý pýnkti Máskeýde ashyldy. Munda tań atysymen 159 áskerı qyzmetshi daýys berip úlgirdi.
«Qazaqstan Prezıdentiniń saılaýyna qatysý - bizdiń konstıtýtsııalyq quqyǵymyz jáne azamattyq boryshymyz. Bul shara - el taǵdyry. Memleket basshysyn tańdaý arqyly biz óz bolashaǵymyzǵa, tutastaı elimiz qadam basar jolǵa tańdaý jasaımyz. Men árbir qazaqstandyqtyń daýysy mańyzdy dep sanaımyn. Bizdiń árqaısysymyz saılaýǵa osy jaýapkershilikti túsine otyryp keldik. Týǵan elimizden jyraqta júrsek te, onyń taǵdyry bizdi beı-jaı qaldyrmaýy tıis dep oılaımyn», - deıdi Reseı Federatsııasy Qorǵanys mınıstrligi Áskerı ýnıversıteti 5-kýrsynyń kýrsanty Danııar Janjúmenov. Osylaısha daýys berý bizdiń áskerı qyzmetshilerimiz júrgen basqa elderde de ótýde. Olardyń árbiri saılaý ýchaskesine jete alýy úshin kúni buryn barý jáne qaıtý baǵyttaryna áýe jáne temir jol kólikterine bıletter alynǵan bolatyn. QR Prezıdentiniń saılaýyna Reseıde (248 adam), Belarýste (35 adam), Ýkraınada (19 adam), Túrkııada (73 adam), Ońtústik Koreıada (4 adam), AQSh-ta (8 adam), Qytaıda (30 adam), Ulybrıtanııada (1 adam), Germanııada (1 adam) jáne Úndistanda (12 adam) áskerı joǵary oqý oryndarynda oqýda júrgen barlyǵy 437 qazaqstandyq kýrsant pen ofıtser qatysyp úlgerdi. Ornalasqan jerlerine qaramastan olardyń árqaısysy óz azamattyq boryshyn atqaryp, óz tańdaýyn jasady.