Shetelde oqıtyn stýdentter tabysy úshin deklaratsııa tapsyrmasa, qansha aıyppul salynady
ASTANA. KAZINFORM — Qazaqstan azamattary byltyr tapqan tabysy úshin deklaratsııany bıyl 15 qyrkúıekke deıin tapsyrýǵa tıis edi. Mundaı talaptan shetelde oqıtyn stýdentter de bosatylmaıdy. Al deklaratsııany tapsyrmasa, ne keshiktirse, ákimshilik jaýapkershilik qarastyrylǵan.
Bul jóninde resmı saýalymyzǵa joldaǵan jaýabynda QR Qarjy mınıstrliginiń Memlekettik kirister komıteti málimdedi.
Komıtet málimetinshe, shetelderde oqý, taǵylymdamadan nemese tájirıbeden ótý kezeńinde Qazaqstan azamaty rezıdent dep sanalady. Al shetelde júrgen rezıdent salyqtan bosatylmaıdy.
Eske salaıyq, buǵan deıin shetelde oqıtyn stýdent deklaratsııany myna jaǵdaılarda tapsyrýy keregin jazǵanbyz:
- 2025 jylǵy 31 jeltoqsanda sheteldik bankterdegi shottarynda jalpy somasy 1 000 AEK-den, ıaǵnı 3,9 mln teńgeden asatyn qarajat bolsa;
- shetelde tirkelgen múlki bolsa. Oǵan jyljymaıtyn múlik, kólik, bıznestegi úles, baǵaly qaǵazdar men tsıfrlyq aktıvter jatady;
- quny 20 myń AEK-den, ıaǵnı 78,6 mln teńgeden asatyn aktıv satyp alsa.
Bul jaǵdaılardyń biri bolsa, shetelde bilim alyp jatqan qazaqstandyq stýdent el qatarly 15 qyrkúıekke deıin deklaratsııa tapsyrýy tıis edi.
Al tapsyrmaǵandarǵa ne keshiktirgenderge ákimshilik jaýapkershilik qarastyrylǵan.
— Deklaratsııany belgilengen merzimnen keıin usyný salyq eseptiligin ýaqytyly usynbaý bolyp esepteledi. Ondaı jaǵdaıda Ákimshilik quqyq buzýshylyq týraly kodekstiń 272-baby 1-bóligine saı, eskertý beriledi. Al ákimshilik jaza qoldanylǵannan keıin bir jyl ishinde qaıtadan osy quqyq buzýshylyq jasalsa, ÁQBtK-niń 272-baby 2-bóligine sáıkes, on bes aılyq eseptik kórsetkish mólsherinde aıyppul salynady, — dep habarlady Memlekettik kirister komıteti.
Aıta ketetin jaıt — deklaratsııany tapsyrýdyń belgilengen merzimi ótip ketse de, azamattar keshigip bolsyn deklaratsııa tapsyrýǵa quqyly. Demek, «ýaqyty ótip ketti, endi tapsyrmaı-aq qoısam da bolady» dep jaıbaraqattyqqa salyný ákimshilik jaýapkershilikke ákep soǵýy múmkin.
Eske salaıyq, buǵan deıin «Sheteldik ýnıversıtettiń stıpendııasyna salyq salyna ma?» degen suraqqa jaýapty jarııalaǵanbyz.
