Shetelde oqıtyn qazaqstandyq stýdentter deklaratsııa tapsyrýy kerek pe
ASTANA. KAZINFORM — Memlekettik kirister organdary sheteldik joǵary oqý oryndarynda bilim alyp júrgen qazaqstandyqtarǵa jalpyǵa birdeı deklaratsııalaý talaptary qalaı qoldanylatynyn túsindirdi. 2025 jyl boıynsha salyq deklaratsııasyn tapsyrý merzimi 2026 jylǵy 15 qyrkúıekte aıaqtalady.
Shetelde bilim alyp júrgen Qazaqstan azamattary elimizdiń salyq rezıdenti bolyp qala beredi. Alaıda bul olardyń barlyǵy deklaratsııa tapsyrýǵa mindetti degen sóz emes.
Stýdent deklaratsııany myna jaǵdaılardyń keminde biri bolǵanda tapsyrýy kerek:
— 2025 jylǵy 31 jeltoqsanda sheteldik bankterdegi shottarynda jalpy somasy 1 000 AEK-den, ıaǵnı 3,9 mln teńgeden asatyn qarajat bolsa;
— shetelde tirkelgen múlki bolsa. Oǵan jyljymaıtyn múlik, kólik, bıznestegi úles, baǵaly qaǵazdar men tsıfrlyq aktıvter jatady;
— quny 20 myń AEK-den, ıaǵnı 78,6 mln teńgeden asatyn aktıv satyp alsa.
Sheteldik ýnıversıtettiń stıpendııasyna salyq salyna ma
2025 jylǵy 1 qańtardan bastap jalpyǵa birdeı deklaratsııalaýdyń tórtinshi kezeńin engizý toqtatyldy. Sonyń nátıjesinde buryn osy kezeńde deklaratsııa tapsyrýy tıis bolǵan azamattardyń basym bóligi, sonyń ishinde stýdentterdiń kóbi bul mindetten bosatyldy.
Al 2026 jylǵy 1 qańtardan bastap kúshine engen jańa Salyq kodeksine sáıkes, sheteldik joǵary oqý oryndary beretin stıpendııalar men granttarǵa jeke tabys salyǵy salynbaıdy.
Sonymen birge memlekettik kirister organdary sheteldegi bank shottary týraly aqparatty jasyrmaýǵa shaqyrady. Qazaqstan halyqaralyq avtomatty aqparat almasý júıesi arqyly azamattardyń sheteldegi qarjy shottary jónindegi málimetterdi turaqty túrde alyp otyrady.
Deklaratsııany belgilengen merzimde tapsyrmaǵan jaǵdaıda ákimshilik jaýapkershilik qarastyrylǵan. Aıyppul mólsheri 15-ten 30 AEK-kige deıin jetýi múmkin.
Deklaratsııany elektrondy túrde Salyq tóleýshiniń kabıneti nemese bankterdiń mobıldi qosymshalary arqyly tapsyrýǵa bolady.
Aıta keteıik, buǵan deıin Qazaqstanda jeke múddeler týraly deklaratsııany kim jáne qashan toltyrýy kerektigi habarlandy.
