Shetelde qıyndyqqa tap bolǵan qazaqstandyqtar kóbeıdi — Mınıstrlik eskertý jasady
ASTANA. KAZINFORM — Shetelge shyqqan qazaqstandyqtardyń vızalyq jáne kóshi-qon talaptaryn saqtamaýy túrli qıyndyqtarǵa ákelip jatyr. Syrtqy ister mınıstrligi sońǵy ýaqytta elde júrý merzimin buzý, deklaratsııalanbaǵan taýar alyp ótý jáne tranzıt talaptaryn saqtamaý sııaqty jaǵdaılar jıilegenin málimdedi.
— Bul rette eń aldymen, elde bolý merzimderin buzý, tyıym salynǵan nemese deklaratsııalanbaǵan taýarlardy alyp ótýge áreket jasaý, sondaı-aq shet memleketterdiń aýmaǵynda tranzıtpen ótý jáne bolý qaǵıdalaryn saqtamaý jaǵdaılary sóz bolyp otyr. Osyǵan baılanysty otandastarymyzdy shetelge shyǵý aldynda baratyn eldiń, sondaı-aq tranzıt arqyly ótetin memleketterdiń zańnamasyn, vızalyq jáne kóshi-qon talaptaryn muqııat zerdeleýge shaqyramyz, — dedi QR SІM resmı ókili J. Úsenov Astanada ótken aptalyq brıfıngte.
Onyń aıtýynsha, pasporttardyń, vızalardyń, elde bolýǵa berilgen ruqsattardyń jáne basqa da qajetti qujattardyń jaramdylyq merzimderine erekshe nazar aýdarǵan jón.
— Medıtsınalyq saqtandyrýdy rásimdeýdi, áýe bıletterin tek resmı servıster arqyly satyp alýdy, áýe kompanııalarynyń bagaj ben tranzıtke qatysty talaptaryn saqtaýdy, qujatty úshinshi tulǵalarǵa bermeýdi, sondaı-aq ishindegi zattardyń mazmunyna tolyq kóz jetkizbegen jaǵdaıda bógde adamdardyń sómkelerin, sálemdemelerin jáne basqa da zattaryn alyp júrýden bas tartýdy usynamyz, — dedi Janbolat Úsenov.
Shetelge jumys isteý, bilim alý nemese emdelý maqsatynda shyǵatyn azamattar barlyq qajetti qujattardyń, shaqyrýlardyń, eńbek sharttarynyń jáne ruqsattardyń zańnama talaptaryna sáıkes durys rásimdelgenine aldyn ala kóz jetkizýi qajet.
— Jappaı toptyq saparlardy uıymdastyrýshylarmen ýaǵdalastyqty tekserý, sondaı-aq keleńsiz jaǵdaılarǵa arnaıy is-qımyldardy josparlaý óte mańyzdy. Mysal retinde jaqynda bolǵan rezonansty ahýaldy atap ótýge bolady. Onda 200-den astam qazaqstandyq stýdent AQSh-ta úısiz-kúısiz qalǵan bolatyn. Baqytymyzǵa oraı qazirgi ýaqytta barlyǵy da Qazaqstanǵa oraldy.
Qazaqstannyń dıplomatııalyq ókildikteri men konsýldyq mekemeleri óz quzyreti sheginde azamattarǵa qajetti konsýldyq-quqyqtyq kómek kórsetetinin erekshe atap ótkimiz keledi. Sonymen birge bolý eliniń zańnamasyn saqtaý jáne belgilengen talaptardy oryndaý úshin jaýapkershilik tikeleı azamattyń ózine júkteledi, — dedi QR SІM resmı ókili.
Buǵan deıin QR SІM resmı ókili Grýzııada ruqsatsyz jumys istegender 5 jylǵa deıin elden shyǵarylýy múmkin ekenin aıtqan edi.
Al Taıland Qazaqstan azamattarynyń vızasyz júrý merzimin qysqartqan.
