Shetelde Qazaqstannyń qandaı taýarlary tanymal

ASTANA. KAZINFORM – Saýda jáne ıntegratsııa mınıstri Arman Shakqalıev sheteldik saýda platformalarynda suranysqa ıe qazaqstandyq taýarlar týraly aıtyp berdi.

«Qytaıda eń aldymen, Qazaqstannyń tamaq ónimderi tanymal, olar – bal, kondıterlik ónimder jáne alkogoldi sýsyndar. Taǵam taýarlary elektrondy platformalarda tanymal jáne suranysqa ıe», — dep jaýap berdi Arman Shaqqalıev Úkimet úıinde ótken baspasóz máslıhatynda.

Basqa elder boıynsha mınıstr ár memlekette ártúrli taýarlar suranysta ekenin jetkizdi.

«Jalpy alǵanda, halyq tutynatyn taýarlar, azyq-túlik, qolónermen baılanysty buıymdarymyz tanymal. Qoldan jasalǵan buıymdar boıynsha qyzyqty satylymdar bar. Eýropalyq jáne amerıkalyq naryqtarda zergerlik buıymdarymyz suranysqa ıe», - dep tolyqtyrdy Arman Shaqqalıev.

Buǵan deıin Saýda mınıstri qazaqstandyqtar onlaın dúkenderden qandaı taýarlardy jıi alatynyn aıtqan edi.

Sondaı-aq, Arman Shaqqalıev Reseıdiń Sankt-Peterbýrg qalasyndaǵy Wildberries qoımasynyń órtenýi jóninde pikir bildirdi.