Shetelde qazaqstandyqtardyń qylmystyq jolmen tapqan 100 mln dollary buǵattaldy
«Ótken jyldyń ózinde ǵana sottalǵandardy qaıtarý, berý jáne quqyqtyq kómek kórsetý máseleleri boıynsha Brazılııa, Mońǵolııa, Arab Ámirlikteri, Ýkraına elderimen 7 kelisimshartqa qol qoıyldy. Tolyqtaı alǵanda, alys shet memlekettermen 63 ekijaqty kelisimshart jasalǵan. Atalǵan kelisimsharttardyń arqasynda 2018 jyly Qazaqstan shetel memleketterine 123 qylmyskerdi qaıtaryp, shetelden 70 adamdy ekstradıtsııalady», - dedi ol.
Máselen, Bas prokýrordyń dereginshe, ótken jyly adam óltirgen N.Esenamanov pen R.Najaev Qyrǵyzstannan, lańkestik qylmysqa qatysy bar E.Kúnshyǵarov Túrkııadan, Aqtóbe oblysynda avtobýsta 52 adamnyń órtenip ketý oqıǵasyna qatysty O.Mehtıev Ózbekstannan Qazaqstanǵa jetkizildi.
Ekijaqty kelisimshart bolmasa da ótken jyly birqatar memleketten qylmyskerler elge jetkizildi. Atap aıtqanda, Grekııa lańkestik qylmysqa qatysy bar D.Haısındi, Germanııa iri kólemde alaıaqtyq jasaǵan B. Ibragımov pen H.Izgııaevty jáne psıhotropty zattar kontrabandasymen aınalysqan G.Leladzeni Qazaqstanǵa qaıtarǵan.
«Shetelde qylmystyq jolmen alynǵan 100 mln dollardan astam soma anyqtalyp, buǵattaldy. Bul jumystar jalǵasa beredi. Aǵymdaǵy jyly mundaı kelisimshartty Ońtústik Koreıa, Kýba, Grekııa jáne Makedonııamen arada qol qoıýdy josparlap otyrmyz», - dedi Qaırat Qojamjarov.
