Shetelde kásipkerler halyqtyń qaltasyn oılaıdy - Atameken
«Bıyl men Japonııada oqýda boldym. Maǵan sol jerdegi kásipkerlerdiń tutynýshyǵa degen qarym-qatynasy qatty unady. Mysaly, qazir bizde tamaq beretin jerlerde sháımen birge 2 grammdyq qantty beredi. 15 jyl buryn Japonııaǵa barǵanda ondaı qantty barlyq jerlerde taratatyn. Ondaı ónim bizge de keldi. Al osy joly barsam, japondyqtar ol qantty 0,75 grammdap berip jatyr. Nege az beresiz dep surasam, olar aıtady, qazir japon ulty salaýatty tamaqtanýdy qalaıdy. Sondyqtan qantty azdap tutyný qajet. Sonda ónim óndirýshiniń ózi halyqtyń artyq aqshany shyǵarmaǵanyn qalap, qanttyń kólemin azaıtyp otyr», - dedi S.Ábdikárimova Astanada ótken baspasóz máslıhatynda.
Onyń aıtýynsha, japondyqtar ysyrapshyldyqqa da jol bermeıdi. Sondyqtan kez kelgen ónimdi qajetti mólsherde ǵana shyǵarady. Tutynýshyǵa qansha qajet, sonsha alatyndaı etip jasaıdy. «Olardyń ustanymy bylaı, artyq aqshany tólemeńiz, qansha kerek, sonsha alyńyz. Artyq jep qoısań, densaýlyǵyńa da, qaltańa da salmaq túsedi. Osylaısha, kásipkerler halyqtyń densaýlyǵyn da, qaltasyn da oılady. Bizge de sondaı psıhologııa kerek. Shıkizatty únemdep paıdalanǵan jón. Biz de halyqtyń densaýlyǵyn, qaltasyn oılaýymyz qajet», - dep atap kórsetti S.Ábdikárimova.
Osy oraıda ol keshendi túski astar máselesine de toqtaldy. Búginde keıbir dámhanalar bir somaǵa kez kelgen tamaqty salyp alýǵa ruqsat beredi. Ondaıda adam qomaǵaılanyp, artyq tamaq salyp qoıýy ábden múmkin. Al tamaqtyń qaldyqtaryn laqtyrýǵa týra keledi. Shetelde artyq qalǵan tamaq úshin aıyppul tóleıdi. Sonyń arqasynda ysyrapshyldyqqa jol berilmeıdi.