Shetelde qansha qazaqstandyq jazasyn ótep jatyr

ASTANA. KAZINFORM — Búginde 1 myńnan astam Qazaqstan azamaty shet memlekette jazasyn ótep jatyr. Bul týraly Bas prokýrordyń orynbasary Ǵalymjan Qoıgeldıev málim etti.

—1100-den astam qazaqstandyq azamat shetelde jazasyn ótep jatyr, olardyń deni Reseı Federatsııasynda, — dedi Ǵalymjan Qoıgeldıev Májilis otyrysynan keıin ótken baspasóz máslıhatynda.

Onyń aıtýynsha, Qazaqstanda 900 shetel azamaty jazasyn ótep jatyr.

— Biz qazir qazaqstandyqtardy otanǵa qaıtarý boıynsha jumys júrgizip jatyrmyz. Olardyń kóbi uzaq merzimge sottalǵandar, olardy ustaýǵa, ıaǵnı asyraýǵa aıtarlyqtaı qarajat ketedi. Sottalǵandardy tapsyrý týraly kelisim aldymen adamgershilik turǵydan jáne shetelde jazasyn ótep jatqan otandastarymyzǵa kómektesýge baǵyttalǵan, — dep tolyqtyrdy bas prokýrordyń orynbasary.

Aıta keteıik, búgin Májilis Qatarmen arada quqyqtyq kómek máselesine qatysty zańdy qabyldady.

QR Bas prokýrorynyń orynbasary Ǵalymjan Qoıgeldıevtiń aıtýynsha, kelisim kúdiktiler men aıyptalýshylardyń kinásin dáleldeý úshin tıisti is-áreketterdi qamtyp otyr.