Shetelde kadrlar daıarlaý jónindegi respýblıkalyq komıssııa «Bolashaq» stıpendııasyn 472 el azamatyna taǵaıyndady
STANA. Tamyzdyń 17-si. QazAqparat /Rýslan Ǵabbasov/ - Búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti.
«Komıssııanyń otyrysynda bıylǵy oqý jyly «Bolashaq» baǵdarlamasy boıynsha shetelge baratyn balalar sany anyqtaldy. Búginge deıin 3 myń 408 úmitker qujattaryn tapsyrdy. Onyń ishinde 816-sy komıssııanyń qaraýyna shyǵarylyp, sonyń 472-si qazirgi kezde shetelge oqýǵa usynylyp otyr»,-dedi Bilim jáne ǵylym mınıstri Janseıit Túımebaev otyrystan keıingi brıfıngte.
«Biz kvota boıynsha qabyldaý merzimin qyrkúıektiń 30-yna deıin uzarttyq. Soǵan baılanysty álemniń tańdaýly ýnıversıtetterinde oqyǵysy keletin bizdiń balalar qujattaryn áli de tapsyrýǵa bolady. Memleket tarapynan qazir aýyldaǵy jastar úshin arnaıy kvota bar»,-dedi vedomstvo basshysy.
«Ázirge elimizdiń oblystarynyń túlekteri belsendi qatyspaı otyr. Qujat tapsyratyndar kóbine Astana men Almaty qalalarynan. Bul eki qalanyń árqaısysynan 300-den asa qujat tapsyrylsa, al keıbir oblystardan 20-30 ǵana úmitker qujattaryn tapsyrdy. Osy jaǵdaı bizdi alańdatyp otyr. Buǵan baılanysty oblystyq bilim berý basqarmalary jáne oblystyq ákimdikter «Bolashaq» boıynsha óz usynystaryn jiberý jaıynda kóbirek jumys istei qajet dep oılaımyn»,-dep atap ótti J. Túımebaev.
Mınıstrdiń aıtýynsha, úmitkerler kóbinese oqý oryndaryn AQSh, Ulybrıtanııa, Reseı, Shveıtsarııa elderinen tańdap otyr.
Taratylǵan málimetterge qaraǵanda, basym mamandyqtar tizbesinen úmitkerler «Ekonomıka», «Aqparattyq tehnologııalar jáne júıeler», «Týrızm salasyndaǵy menedjment, sport menedjmenti», «Munaı jáne gaz isi», «Tehnologııalar menedjmenti», «Adam resýrstaryn basqarý», «Matematıka», «Elektronıka», «Óndiristik ınjınırıng», «Hırýrgııa» mamandyqtaryn tańdaǵan.
