Shetelde esepte turǵan avtokólik ıeleri polıtseılermen kezdesti – Qostanaı
QOSTANAI. QazAqparat – «Jolda qabyldaý» respýblıkalyq aktsııasy barysynda Qostanaı polıtseılerine 200-den astam suraq qoıyldy. Turǵyndardy qyzyqtyrǵan ózekti másele - sheteldik esepte turǵan kólikti tirkeý boldy, dep habarlaıdy QazAqparat tilshisi.
Kezdesýge qatysqan azamattardyń suraqtaryna Qostanaı oblysy polıtsııa departamenti bastyǵynyń birinshi orynbasary Nyǵmet Ismaǵulov pen «Nur Otan» partııasynyń Qostanaı fılıaly tóraǵasynyń orynbasary Eldar Kúzenbaev jaýap berdi. Suraqtardyń deni sheteldik esepte turǵan kólikti tirkeý máselesine qatysty boldy.
«Shetelden satyp alynǵan árbir avtomashınaǵa jeke qaraý kerek. Bizdiń tarapymyzdan qandaı da bir jazalaý sharalary qoldanylmaıdy. Eger júrgizýshi jol qozǵalysy erejelerin buzsa ǵana, jaýapqa tartamyz. Zań bárine ortaq», - dep túsindirdi polıtsııa polkovnıgi.
Alaıda bastamashy top ókili Dıas Nurmaǵambetovtiń aıtýynsha, bul máseleni Memleket basshysyna jetkizýdi suraıdy.
«Biz kólikti tirkeýge qarsy emespiz, tek shyǵynnyń kóp ekenin aıtqymyz keledi. Biz taǵy da polıtsııa departamentiniń ókilderimen kezdesip, kelissózder júrgizýge daıynbyz», - dep atap ótti ol.
Eldar Kúzenbaev qazir «Nur Otan» partııasy oblystyq fılıalynyń fraktsııasy osy máselege qatysty hat daıyndap jatqanyn, jaqyn arada ortalyq apparatqa jiberiletinin eskertti.
Anatolıı esimdi oblys ortalyǵynyń turǵyny Reseı turǵynyna rásimdelgen avtokólikti júrgizip júrgenin aıtty. Ákimshilik polıtsııa basqarmasynyń bastyǵy Andreı Grıgorevskıı atalǵan kólik Qazaqstan aýmaǵynda 1 jyl 30 táýlik ishinde shekaradan shyǵýy keregin aıtty.
