Shetelde eńbek quldyǵyna tap bolǵan eki qazaqstandyq izdestirilip jatyr

ASTANA. QazAqparat – Elimizdiń Syrtqy ister mınıstrligi tabys tabý maqsatymen shetelde quldyqqa túsken qazaqstandyqtar týraly pikir bildirdi, dep habarlaıdy QazAqparat tilshisi.

«Ońtústik-Shyǵys Azııada bizdiń eki azamatymyz eńbek quldyǵyna tap bolǵan. Olar ótken jyly jeltoqsannyń sońynda Taılandtaǵy elshilik arqyly baılanysqa shyqty. Joǵalǵan azamattardyń ata-anasy bizge habarlasyp kómek surady. Bul alǵash jaǵdaı emes. Birneshe aı buryn taǵy bir azamatymyz osyndaı jaǵdaıǵa tap bolǵan edi. Biz onyń elden shyǵýyna kómektestik», - dedi QR Syrtqy ister mınıstrliginiń resmı ókili Aıbek Smadııarov Úkimet úıinde tilshilerdiń saýalyna jaýap bere turyp.

Onyń aıtýynsha, shetelde joǵalǵan azamattardy izdeý jumysyna memlekettik organdarmen qatar úkimettik emes uıymdar da tartylady.

«Onda tek Qazaqstan emes, basqa elderdiń de azamattary bar. Sondyqtan máseleni keshendi túrde sheshý qajet. Eki azamat boıynsha másele Taılandtaǵy elshiliktiń baqylaýynda. Olar byltyr konsýlǵa habarlasqan. Alaıda qazir joǵalǵan eki azamattan habar joq, másele oń sheshimin tabady dep oılaımyn. Osy oraıda shetelge tabys izdep baratyn azamattardy barynsha abaı bolýǵa shaqyramyz. Jumysqa barmas buryn kelisimshartpen muqııat tanysqan abzal. Bul - azamattardyń jeke jaýapkershiligi», - deıdi ol.