Shetelde demalatyn qazaqstandyqtar sany ishki týrısterden 2 ese kóp
NUR-SULTAN. QazAqparat - Qazaqstanda ishki týrızmge qatysýshylar sany 7 paıyzǵa artqan. Bul týraly QazAqparat «Kazakh Tourism» ulttyq kompanııasyna silteme jasap habarlaıdy.
Statıstıka komıtetiniń derekterine sáıkes, 2018 jyly eldegi qonaqúılerdiń qyzmetine 4,6 mıllıonnan astam ishki týrıst júgingen. Bul ótken jylmen salystyrǵanda 7 paıyzǵa artyq. Mundaı ósim 2016 jyldan beri jalǵasyp keledi.
«Іshki týrızmniń belsendi ósýine qaramastan, shet elderde demalatyndardyń sany ishki týrıstik aǵynnan eki ese derlik kóp. Oǵan tıisti usynys pen ınfraqurylymnyń joqtyǵymen qosa, aqparattyń azdyǵy da sebep bolyp tur. Mysalǵa, eldiń batys aımaqtarynyń turǵyndary Qazaqstannyń shyǵysynda, bolmasa ońtústiginde ne bar ekenin bilmeıdi. Sondyqtan halyqqa elimizdiń týrıstik múmkindikteri jaıly aqparatty turaqty túrde bere otyryp, olardy el ishinde saıahattaýǵa yntalandyrý kerek», - deıdi «Kazakh Tourism» ulttyq kompanııasynyń basqarma tóraǵasy Órken Bısaqaev.
Ulttyq kompanııanyń habarlaýynsha, ishki týrızmdi odan ári yntalandyrý maqsatynda Mádenıet jáne sport mınıstrliginiń tapsyrysy boıynsha Qazaqstanda aqparattyq týrlar tsıkli uıymdastyrylmaq.
20-30 mamyr aralyǵynda Batys Qazaqstannyń 4 aımaǵynyń týrıstik operatorlarynan quralǵan toptyń qatysýymen alǵashqy aqparattyq týr ótkizý josparlanǵan. Olar Nur-Sultan, Shymkent, Almaty qalalaryna, Aqmola, Almaty, Túrkistan jáne Shyǵys Qazaqstan oblystarynyń týrıstik oryndaryna barady dep kútilýde.
