Shetelde alǵan bilimimdi eldiń damýyna jumsaımyn - táýelsizdik qurdasy
Aldaǵy ýaqytta ózge elde jınaǵan mol tájirıbe men bilimin el damýyna sarp etpek oıda, dep habarlaıdy QazAqparat tilshisi.
Táýelsiz Qazaqstan 30 jylda ár salany damytyp, jetistikter qazir saralanyp jatyr. Dál sol sekildi 1991 jyly dúnıege kelgen qazaqstandyqtar qalyptasty, ózin ǵana oılamaı, el damýyna úles qosýǵa bekindi. Sondaı jastyń biri – Mergen Jetkerbaı. Ol 2009 jyly M.Qusaıynov atyndaǵy daryndy balalarǵa arnalǵan oblystyq mektep-ınternatty «Altyn belgimen» aıaqtap, Pekın qalasyndaǵy Qytaı munaı ýnıversıtetinde bilim aldy. Bilim men qoǵamdyq jumysty ushtastyrǵan ol Qazaqstan Respýblıkasynyń Elshiligi janyndaǵy «KSAC Pekın» stýdentter uıymynyń ókili, ISA Qytaı munaı ýnıversıtetindegi halyqaralyq stýdenttik keńes tóraǵasynyń orynbasary boldy. Túrli forýmdar men halyqaralyq kórmeler súıikti ornyna aınalyp, mol tájirıbe jınady. Kórgeni kóp Mergen Jetkerbaı Úkimet delegatsııasynyń Qytaıǵa issapary kezinde otandastarymen ere júrip, kómektesti.
«Ózge eldiń tilin, salt-dástúrin bilý mańyzdy. Tilin jetik meńgerseń ǵana ózińdi erkin sezinip, qajetti bilim ala alasyń. Dos tabý da qıyn bolmaıdy. Osy jolmen men aldymen qytaı tilin úırendim. Qıyn bolǵanymen bir jyldyq eńbegim esh ketpeı, úzdikter qatarynan tabyldym. Sóıtip 4 jyl boıy «Munaı-gaz isi» mamandyǵy boıynsha oqyp, bakalavr dárejesin alyp shyqtym. Tek qytaı tili emes, aǵylshyn tilin de úırendim. Munyń qıyndyǵyn til úırengen, shetelde júrgen jastar jaqsy túsinedi dep oılaımyn. Sóıtip 2011 jyly AQSh-tyń Nıý-Iork qalasynda «Work and Travel USA» baǵdarlamasy arqyly baryp, 2013 jáne 2014 jyldary qysqy demalysta Malazııanyń Kýala-Lýmpýr qalasynda aǵylshyn tilin úıretetin kýrstardan óttim. Qazir qazaq, orys, aǵylshyn, qytaı tilderinde erkin sóıleı alamyn», - deıdi jas kásipker Mergen Jetkerbaı.
Bilimdi jas maman joǵary oqý ornyn aıaqtaǵan soń bir jyldan astam ýaqyt boıy Qytaıdaǵy eń iri munaı jabdyqtaryn óndiretin kompanııada jumys istedi. Elge oralǵan soń qarjyger mamandyǵy boıynsha ekinshi joǵary oqý ornyn bitirdi.
«Buǵan deıin munaı-gaz salasyndaǵy kompanııadan jumys istedim. Al qazirgi kezde munaı-gaz jabdyqtaryn shyǵaratyn kompanııa ıesimin. Men maqsatty túrde osy salanyń damýy jolynda eńbek etip, shetelde alǵan bilimimdi Qazaqstannyń damýy jolynda jumsaǵym keledi. Únemi trenıngterge qatysyp, forýmdarǵa baramyn. Ondaǵy jańa tehnologııany, ádisti eldiń damýyna qaraı ózgertip, jańa keıipte engizýdi jón kóremin. Eshkimdi qaıtalaýdyń, kóshirmesin ákelýdiń qajeti joq. Bizdiń damý jolymyz ózge, demek ózimizge qajettini ózimiz de jasaı alamyz. Tek baǵyt-baǵdardy durys qoıý kerek», - deıdi ol.
Mergen Jetkerbaıdyń dosy kóp. Ásirese Aqtóbede bilim alyp júrgen shaǵynda birge júrgen joldastaryn qurmet tutady. Mektep ınternattaǵy dostyq bárinen ystyq, qymbat.
«Dostarymnyń kóbi ár túrli salada eńbek etedi. Shetelde turatyndar da bar. Internatta oqyǵan soń dostyǵymyz ajyraǵan emes. Jumys babynda tanysyp jatqan dostarymyz bar. Basshy bolǵan soń komandamda ózimmen birge damıtyn adamdardyń bolǵanyn jaqsy kóremin. Trenıngterge qatysyp otyramyn. Ondaǵy jınǵan tájirıbeni zamandastarymmen bólisemin. Sóıtip biz bir-birimizdi qoldap, bıikterdiń baǵyndyra beremiz. Bizdiń jumysymyz órlese, el damıdy, órkendeıdi», - dedi Mergen Jetkerbaı.