Shetel joǵary oqý oryndarymen Strategııalyq áriptestik jónindegi keńes quryldy
ASTANA. KAZINFORM - Sheteldik ýnıversıtettermen yntymaqtastyq aıasynda Strategııalyq áriptestik jónindegi keńes quryldy. Bul týraly QR Premer-mınıstriniń orynbasary Tamara Dúısenova sheteldik ýnıversıtetter basshylarymen kezdesýde málimdedi.
Memleket basshysynyń tapsyrmasyna sáıkes, álemniń jetekshi ýnıversıtetterimen strategııalyq áriptestik ornatý baǵytynda belsendi sharalar qolǵa alynǵany belgili. Búginde elimizdiń túrli aımaqtarynda sheteldik 23 oqý orny jumysyn bastap ketti. Olardyń basshylarymen kezdesýde vıtse-premer Qazaqstan tarapynyń áriptestik baılanysty nyǵaıtýǵa múddeli ekenin jetkizdi.
«Yntymaqtastyqty damytý boıynsha usynystardy talqylap, birlesip ázirleý mańyzdy. Osy jumystyń formatyn saqtap, týyndaǵan máselelerdi birlese qarastyrǵan jón dep sanaımyn. Osyǵan baılanysty, Ǵylym jáne joǵary bilim mınıstrligi janynan Strategııalyq áriptestik jónindegi keńes qurý usynylady. Atalǵan Keńes barlyq qatysýshynyń múddesin eskere otyryp, pikir almasý jáne ınnovatsııalyq sheshimderdi izdeýge arnalǵan turaqty alańǵa aınalady», — dep atap ótti Tamara Dúısenova.
Qazirgi ýaqytta 20-dan astam eldiń ýnıversıtetterimen ózara is-qımyldyń túrli formattary bar. Kezdesýde strategııalyq seriktestiktiń biryńǵaı jalpy erejesin ázirleý qajettigi aıtyldy. Bul ýnıversıtetterdegi akademııalyq jáne basqarý erkindigine áser etpeıdi.
Vıtse-premer jan-jaqty seriktestik ǵylymı zertteý isin damytýǵa, ozyq bilim berý baǵdarlamalary men olardy oqytý ádistemeleri transfertin júzege asyrýǵa baǵyttalatynyn atap ótti. Osylaısha oqytýdyń joǵary standarttaryn qamtamsyz etýge múmkindik týmaq. Sondaı-aq Tamara Dúısenova birlesken ǵylymı jobalar aıasyndaǵy yntymaqtastyq jalǵasatynyn basa aıtty.
«“Ǵylym jáne tehnologııalyq saıasat týraly” zań bul baǵytta qosymsha múmkindikter ashady. Básekege qabilettilikti arttyrýǵa yqpal etetin ǵylymdaǵy jetistikterdi ekonomıka ıgiligine qoldaný biz úshin mańyzdy. Bul úderiste zertteý ýnıversıtetteri sheshýshi ról atqarady», — dedi Tamar Dúısenova.
Kezdesý barysynda sheteldik joǵary oqý oryndarynyń ókilderi Keńes qurý jáne strategııalyq áriptestiktiń jalpy erejelerin engizý ıdeıasyn qoldady. Sonymen qatar yntymaqtastyqty odan ári tereńdetý jóninde pikir almasý ótti.
«Joǵary oqý oryndarynyń reıtıngin túzý men saralaýdy qalyptastyrý ıdeıasyn qoldaımyn. Básekelestik – damýdyń negizi», — dep basa aıtty Heriot-Watt University rektory Mark Bıggs.
Atalǵan JOO fılıaly Q. Jubanov atyndaǵy Aqtóbe ýnıversıtetiniń bazasynda ashyldy.
Áriptesin Reseıdiń MIFI ulttyq ıadrolyq ǵylymı-zertteý ýnıversıtetiniń prorektory Dmıtrıı Savkın de qoldady.
«Mamandar daıarlaýdaǵy birlesken jumys biz úshin mańyzdy. Sondaı-aq ǵylymı-zertteý qyzmetindegi áriptestikti tereńdetýge múddelimiz», — dedi Dmıtrıı Savkın.
