Shetel jáne jergilikti mamandardyń jalaqy boıynsha aıyrmashylyǵy joıylady – zań jobasy

ASTANA. KAZINFORM — Birdeı fýnktsııany atqaratyn qyzmetkerlerdiń jalaqysynda birneshe ese aıyrmashylyq bolmaýy tıis. Bul týraly Májilistiń jalpy otyrysynda jumysshylardyń quqyqtaryn qorǵaýǵa arnalǵan zań jobasyn birinshi oqylymda talqylaý kezinde depýtat Ashat Aımaǵambetov málim etti.

- Bir laýazym men bir mamandyq boıynsha jumys isteıtinderdiń jalaqysyndaǵy alshaqtyq máselesi bar. Bir kásiporynda, birdeı laýazymda, birdeı fýnktsııany atqaratyn qyzmetkerlerdiń jalaqysynda birneshe ese aıyrmashylyq bolmaýy tıis. Alaıda, qazirgi zańnamada bul másele rettelmegen. Sondyqtan osyndaı ádiletsizdik jıi kezdesedi. Mysaly, birdeı jumysty atqaryp, birdeı talaptarǵa saı keletin shetel mamandary men jergilikti mamandar arasyndaǵy jalaqylary boıynsha alshaqtyq problemasy bar. Sondyqtan da, biz Ujymdyq shartqa bir laýazym ishindegi eń joǵary jáne eń tómengi jalaqynyń ara qatynasyn mindetti túrde belgileý týraly normany usyndyq, - dedi A. Aımaǵambetov.

Onyń paıymynsha, bul norma eńbekaqy tóleýdegi ádildik úshin qajet.

Aıta keteıik, buǵan deıin jumysker eńbek shartynda kózdelmegen fýnktsııalardy oryndaýdan bas tartýǵa quqyly ekenin jazǵan edik.