Shetel valıýtasyndaǵy depozıtterdiń úlesi qaı deńgeıde tómendegeni anyqtaldy

ASTANA. QazAqparat - Qazan aıynda teńge nyǵaıdy. Bul týraly Parlament Májilisiniń jalpy otyrysynda QR Ulttyq bankiniń tóraǵasy Danııar Aqyshev málim etti, dep habarlaıdy QazAqparat.

«Qazanda valıýta naryǵy Ulttyq bank operatsııalarynyń arqasynda turaqtandy. 31 qazandaǵy jaǵdaı boıynsha aıyrbastaý baǵamy bir AQSh dollary úshin 334,71 teńge boldy. Teńgeniń bir aıdaǵy nyǵaıýy 1,9 paıyzdy qurady, jyl basynan  beri álsireý shamaly - 0,4 paıyz», - dedi UB basshysy.

Onyń sózine qaraǵanda, qańtar-qyrkúıekte Ulttyq banktiń halyqaralyq rezervteri (31 qazanda jańartylǵan derekter boıynsha) 9,1 paıyzǵa, ıaǵnı 32,2 mlrd AQSh dollaryna deıin ulǵaıdy. Ulttyq qordyń valıýtalyq aktıvteri 57,1 mlrd. AQSh dollaryn, al el rezervteriniń jalpy somasy 89,3 mlrd AQSh dollaryn nemese Jalpy ishki ónimniń 60 paıyzyn qurady.

Budan bólek D. Aqyshev dollarsyzdaný úderisne toqtaldy.

«Depozıt naryǵynda dollarsyzdandyrý protsesteri jalǵasýda. Shetel valıýtasyndaǵy depozıtterdiń úlesi ótken jyldyń qańtaryndaǵy eń joǵary 70 paıyzdan qazirgi kezde 49 paıyzǵa deıin tómendedi. Valıýta naryǵyndaǵy turaqtylyqtyń saqtalýy jáne ınflıatsııa deńgeıiniń tómendeýi aqshany teńgede jınaqtaýǵa sebep bolady», - dep atap ótti Ulttyq bank tóraǵasy.

Sonymen qatar, ol nesıeleý naryǵynda jandaný júrip jatqanyn sóz etti. Jyl basynan beri bankter nesıeleriniń kólemi 13,2 trln teńgege deıin, ıaǵnı 4 paıyzǵa ulǵaıdy. Ulttyq valıýtadaǵy nesıelerdiń deńgeıi 11 paıyzǵa nemese 9,5 trln teńgege deıin artty. Nesıeler boıynsha ortasha alynǵan mólsherleme qyrkúıekte 14 paıyzǵa deıin tómendedi.