Shetel sarapshylary Qazaqstandaǵy ishki týrızmniń damýyn joǵary baǵalady
ALMATY: QazAqparat - KITF 2016 kórmesine qatysqan sheteldik sarapshylar Qazaqstandaǵy týrızmniń damýy týraly pikirlerimen bólisti.
Ál-Farabı atyndaǵy Qazaq Ulttyq ýnıversıtetiniń rekreatsııalyq geografııa jáne týrızm kafedrasynyń «Sabre Travel Network Central Asia» kórmesi aıasynda júrgizgen marketıngtik zertteýine sáıkes, kórmege qatysýshylardyń 58 paıyzy ishki baǵyttaǵy týrızmniń damýyn joǵary baǵalady.
Zertteý jumystaryna 38 otandyq jáne sheteldik kompanııalardyń ókilderi, onyń ishinde 4 týragenttik, 14 týroperator, 2 memlekettik uıym, 12 qonaq úı, 1 áýe tasymaldaýshynyń sarapshylary qatysty.
Saýalnama barysynda respondentterdiń 11 %-y týrızm salasynyń damýyna kóńili tolmasa, 26 %-y qanaǵattanarlyq dep sanaıtyny belgili boldy, 55 %-y týrızm damýyn jaqsy baǵalady. Qalǵan 8%-y qazirgi jaǵdaıdy óte joǵary dep baǵa berdi.
Syrttan keletin týrızmniń ahýalyn 25 respondent táýir dep sanasa, 19 qatysýshy óte jaqsy degen baǵa berdi.
Іshki týrızmge kelsek, respondentterdiń 58 %-y onyń damýyna kóńili tolsa, 24 %-y áli tómen ekendigin aıtqan.
Suralǵandardyń 71 %-y bolashaqta Qazaqstandaǵy iskerlik týrızmniń kólemi artatynyna senim bildirgen.
«Bıylǵy zertteýler ishki týrızmniń damý bolashaǵy jarqyn ekendigin kórsetti. Byltyr osy jaýapty respondentterdiń 13 % ǵana bergen bolatyn. Kóptegen kásipkerler ishki naryqqa beıimdele bastady.
Suranys artyp keledi. QR Úkimeti de qajetti is-sharalardy qolǵa alýda.
Týrıstik nysandardyń sany artyp, ınfraqurylym damyp keledi, týrızmniń damýyna barynsha qarjy bólinip jatyr. Bul bolashaqta qalypty básekelestiktiń damýyna ákeledi», - dedi Sabre Travel Network Central Asia dırektory Pavel Spıtsyn.
Aıta ketý kerek, KITF 2016 kórmesi Almatyda 20-22 sáýir aralyǵynda ótken. Oǵan álemniń 31 elinen 300-ge jýyq kompanııa qatysty.
