Shetel ruqsat blankilerin berý kezinde adamı faktor bolmaıdy — Kólik mınıstrligi

ASTANA. KAZINFORM — Avtomobıl tasymaly salasyndaǵy ruqsat berý júıesin qoldaný qaǵıdalaryna ózgeris endi. 

Elimizdiń Kólik mınıstrligi sheteldik ruqsat blankilerin bólýdiń jańa tártibin ázirledi.

Ol otandyq tasymaldaýshylarǵa qandaı da bir shekteýsiz sheteldik ruqsat blankilerin berýdi kózdeıdi.

Bul sharalar adamı faktordyń aldyn alyp, júıeniń ashyqtyǵyn qamtamasyz etedi.

Jańa erejelerge sáıkes, sheteldik ruqsat blankilerin alý týraly suranys árbir avtokólik quralyna jeke beriledi.

Sondaı-aq qaǵıdada kózdelgen talaptardyń biri — kórsetiletin qyzmetti alýshynyń mindetti túrde kýáligi men ruqsat kartochkasynyń bolýy.

Budan basqa, avtokólik quralynyń kirý jáne shyǵý faktilerin tirkeý «Búrkit» aqparattyq júıesi arqyly júzege asyrylady.

Bul óz kezeginde sheteldik ruqsat blankilerin kóleńkeli naryqta qaıta satýdyń aldyn alady dep josparlanyp otyr. 

Tasymaldaýshynyń ótinimi avtomattandyrylǵan júıe arqyly qabyldanady jáne ruqsat blankileri Halyqqa qyzmet kórsetý ortalyǵy arqyly beriledi. 

Engizilip jatqan júıede tasymaldaý tarıhy men kóliktiń belsendiligi boıynsha shekteýler joq, sondaı-aq kóleńkeli naryqta qaıta satý úshin alǵysharttar tolyǵymen alynyp tastalǵanyn atap ótý qajet.

Blank bólýdiń qoldanystaǵy júıesine keletin bolsaq, búgingi tańda alynǵan blankilerdiń 50% tasymaldaýshyǵa olardyń ótken jylǵy jumysyn eskere otyryp bekitiledi, al qalǵan 50% rezervtik blankiler sanatyna aýysady jáne olardy barlyq tasymaldaýshy ala alady.

Aıta keterligi, qoldanystaǵy júıede blankiler belgili bir tasymaldaýshyǵa bekitilip, bul óz kezeginde erkin básekelestikti shekteıtin.

Sonymen qatar blank buryn-sońdy halyqaralyq tasymalda jumys istegen avtomobılderge ǵana beriletin, nátıjesinde blankilerdiń jasandy tapshylyǵy paıda boldy.

Osy rette adal qyzmet atqaryp júrgen tasymaldaýshylar tasymaldaýǵa arnalǵan júk bolǵannyń ózinde blank ala almaıtyn.

Sheteldik ruqsat blankilerin berý men qaıta satý bolmas úshin olardy otandyq tasymaldaýshyǵa berý kezinde zańdy nemese jeke tulǵanyń aty-jóni kórsetiledi.

Ruqsat blankilerin úshinshi tulǵalarǵa berý nemese otandyq tasymaldaýshynyń basqa otandyq tasymaldaýshynyń ruqsat blankilerin paıdalanǵany úshin alty aı merzimge ruqsat blankilerin alýǵa shekteý qoıylady.