Shetel ónimin «Qazaqstanda jasalǵan» dep satýda: Áshimbaev memlekettik satyp alý júıesin synady
ASTANA. KAZINFORM – Senat tóraǵasy Máýlen Áshimbaev memlekettik satyp alý salasyndaǵy monıtorıng júıesine qatysty pikirin aıtty.
Onyń aıtýynsha, elimizde sybaılas jemqorlyqqa qatysty quqyq buzýdyń 80 paıyzy memlekettik satyp alýlarmen baılanysty. Mundaı derekterdi azaıtý úshin oqıǵa bolǵannan keıin emes, aldyn ala jumys isteıtin baqylaý júıesi qajet.
«Monıtorıng júıesiniń otandyq óndirýshilerdi, memlekettik satyp alýdaǵy qazaqstandyq úlesti qoldaýǵa yqpal etýi óte mańyzdy. Prezıdentimiz memlekettik satyp alýlardaǵy elishilik qundylyǵymyzdyń úlesin 60 paıyzǵa deıin jetkizýdi mindet etip qoıdy. Qazir siz 50 paıyzy qamtamasyz etilgen dep aıtyp otyrsyz. Biz kásipkerlermen kezdesýlerde osy máselege basa nazar aýdaryp kelemiz. Sol kezde olar keıbir jetkizýshiler ónimdi basqa elderden jetkizip, oǵan «Qazaqstanda jasalǵan» logotıpin japsyryp qoıatynyn aıtady. Osylaısha, olar tenderlerge qatysyp, dempıng pen tómen baǵa esebinen utyp alý múmkindigine ıe bolady. Eger osy zańdy depýtattar qoldasa jáne oǵan Memleket basshysy qol qoısa, monıtorıng júrgizetin júıeniń qurylýyna yqpal etedi dep úmittenemiz. Sondaı-aq memlekettik organdar óz ónimderin óndiretin, jumys oryndarymen qamtamasyz etetin, salyq tóleıtin naqty qazaqstandyq óndirýshilerdi qoldaýyna jol ashylady dep senemiz», - dedi Senat tóraǵasy.
Aıta keteıik, Senattyń jalpy otyrysynda senatorlar birqatar zańdy qarady. Onyń ishinde «Memlekettik satyp alý týraly» zań jáne oǵan ilespe «Qazaqstan Respýblıkasynyń keıbir zańnamalyq aktilerine satyp alý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdar da bar.
Palata spıkeri zańnamalyq túzetýlerdiń mańyzyna nazar aýdaryp, Memleket basshysy Joldaýda satyp alýdyń jańa sapaly júıesin engizýdi tapsyrǵanyn tilge tıek etti. Sondaı-aq ol zańnyń negizgi normalaryna toqtalyp ótti.
