Shetel kompanııalary sý únemdeý jabdyqtaryn Qazaqstanda shyǵarady
«Oblystardaǵy ákimdikterdiń derekteri boıynsha bıyl 1,58 mln ga sýarmaly jer óńdelgen. Byltyrǵy alynǵan sý kólemin eskersek, 1,58 mln ga jerdi sýarý úshin 11,4 mlrd tekshe metr sý qajet bolady. Onyń negizgi úlesi kúrish jáne jem-shóp daqyldaryn sýarýǵa paıdalanylady. 1 mln 126 myń ga nemese egistiktiń 71 paıyzy jerústi ádisimen, 97,9 myń gektary kúrish alqaptaryna sý jiberý arqyly sýarylady, sondaı-aq 278,6 myń ga alańda nemese 17,6 paıyzynda zamanaýı tamshylatyp jáne jańbyrlatyp sýarý júıeleri paıdalanylady», - dedi E. Qarashókeev Úkimet otyrysynda.
Osy oraıda ol sý únemdeý tehnologııalaryn engizý boıynsha jumystarǵa toqtaldy.
«Birinshiden, ınvestıtsııalyq sýbsıdııalaý aıasynda fermerlerdiń sý únemdeý tehnologııalaryn satyp alýǵa, sondaı-aq sý alý jáne berý jónindegi negizgi ınfraqurylymdy júrgizýge jumsaǵan shyǵyndarynyń 50% óteledi. Ekinshiden, elimizde jobalardy óz qarajaty esebinen iske asyrý múmkindigi bar ınvestorlardy tartý boıynsha jumys iske asyrylyp jatyr. «Máselen, ızraıldik «METZERPLAS» kompanııasy osy kúzde tamshylatyp sýarýǵa arnalǵan qubyr shyǵaratyn zaýytty iske qosýdy josparlap otyr. Sonymen qatar qytaıdyń VODAR kompanııasy men túriktiń AFKO kompanııasy jańbyrlatqysh mashına shyǵaratyn zaýyttar ashýdy josparlap otyr. Úshinshiden, sý berý jónindegi qyzmetterdiń qunyn sýbsıdııalaý júzege asyrylady. Munda bir tekshe metr sýǵa bólinetin sýbsıdııalardyń mólsheri tarıfterdiń paıyzdyq qatynasyna qaraı 50 paıyzdan 85 paıyzǵa deıin saralanǵan túrde belgilenedi», - dedi mınıstr.
