Shetel qazaqtarynyń fýtbol dodasy máresine jetti
Eki kúngi jalǵasqan sporttyq jarysqa qandastarymyz jıi qonystanǵan Mońǵolııa, Qytaı, Ózbekstan, Túrkııa, Aýǵanstan, Iran, Reseı, Qyrǵyzstan tárizdi alys-jaqyn shet eldermen qatar Astana, Almaty, Shymkent qalalarynan jáne oblystardan barlyǵy 22 komanda qatysty.
Jas erekshelikterin qaraı 30-ǵa deıingi jáne 30-dan keıingi komandalar bolyp eki topqa bólingen oıynshylardyń ishinen, fınalǵa joldama alǵan 8 komanda júldeli oryndarǵa talasty.
Sonymen, 30 jasqa deıingi jastar arasynda Reseıdiń Orynbor qalasynan kelgen «Baıterek» komandasy bas júldeni qanjyǵaǵa baılady. Ekinshi oryndy Almatylyq «Birlik -kerýen» komandasy aldy. Al, Qaraǵandy oblysy atynan óner kórsetken «Zarapshan» komandasy úshinshi orynǵa taban tirese, óskemendik «Jeti Qaba» komandasy úzdik tórttikti túıindedi.
30 jastan joǵary fýtbolshylar tobynan birinshi oryndy almatylyq «Alash» komandasy ıelendi. Ekinshi oryn Ózbekstannan kelgen «Qulager» komandasyna buıyrsa, elordalyq «Atameken» komandasy júldeli úshinshi orynǵa qol jetkizip, ustazdardan quralǵan «Zerdeli» komandasy tórtinshi oryndy qanaǵat tutty. Týrnırde erekshe kózge túsken oıynshylar marapattalyp, jeńimpaz komandalarǵa aqshalaı syılyq tabystaldy.
Bıyl besinshi ret uıymdastyrylǵan fýtbol básekesi jekelegen atymtaı jomart azamattardyń qoldaýymen ótti.
«Osyndaı sporttyq sharalar arqyly qazaq jastarynyń basyn qosý, olardyń rýhyn biriktiredi, birligimizdi nyǵaıtady. Alystaǵy qazaq jastarynyń elge kelýine yqpal etedi dep oılaımyn. Bul shara tek ózara dopqa talasyp myqtylyqty anyqtaý emes, máni tereń mazmuny bıik. Kesheli beri ár elde týyp-ósken ár tilde sóıleıtin qazaq jastarynyń ózara shúıirkelesip, qazaqsha sóılesýge tyrysyp jatqany qýantady. Biz kásipker retinde osyndaı ultty birikteretin, rýhty oıatatyn sharalardy qoldaýǵa ár qashanda daıynbyz», -deıdi sharanyń bas demeýshisi «Asqar taý» kompanııasynyń dırektory Ernur Bolatuly.
Dostyq dop dodasyna alystan alystan at terletip kelip, bas júldeni qanjyǵa baılap qaıtqan «Baıterek» komandasynyń oıynshysy Nursultan Makanov Orynborda qazaq jastary jıi bas qosyp turatynyn aıtady.
«Bul shara bizdiń kóptegen qazaq jastarymen tanystyrdy. Men Nur-sultan qalasyna birinshi ret kelip turmyn qala erekshe unady. Bul dodaǵa jaqsy daıyndaldyq menińshe bári sátimen bitti. Biz ótken jyly Almatydaǵy álem qazaqtarynyń týrnırinde bas júldeni utyp, osy kýbokty alyp ketken edik. Mine, Orynbordan arqalap kelip, qaıta ony alyp baramyz. Buıyrsa keler jylǵy dodaǵa qatysýǵa daıynbyz», - deıdi ol.
Aıta ketsek, sharany «Otandastar qory» KEAQ jáne Dúnıejúzilik qazaqtar qaýymdastyǵy uıymdastyryp otyr.
