Shetel kásipkerleri úshin «ınvestor vızasy» engiziledi

ASTANA. QazAqparat – Sheteldik úzdik ǵalymdarǵa 10 jylǵa «ǵylymı-pedagogıkalyq vıza» beriledi. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

Mınıstrdiń aıtýynsha, «Ashyq Qazaqstan 500+» atty kóshi-qon saıasatynyń jańa tujyrymdamasynyń ekinshi baǵyty – bıznes-ımmıgratsııa.

«Investıtsııa tartý úshin álem memleketteri arasyndaǵy báseke jyl ótken saıyn kúsheıip keledi. Osy oraıda, Memleket basshysynyń tapsyrmasyna sáıkes jáne Ekonomıkalyq yntymaqtastyq jáne damý uıymy memleketteriniń tájirıbesine súıene otyryp, ınvestıtsııalyq vıza berýdiń tómengi shegin 300 myń AQSh dollaryna deıin azaıtý qarastyrylǵan», dedi ol.

Onyń atap ótýinshe, elimizge keminde osyndaı kólemde ınvestıtsııa salǵan shetel kásipkerleri úshin «ınvestor vızasyn» engizý usynylady.

«Bul vıza Qazaqstan aýmaǵynda turýǵa, bıznesin tirkeýge, múlikke ıelik etýge, qyzmetkerler jaldaýǵa, qarjy tólemderin júrgizýge jáne olardyń kásipkerlik qyzmetinen týyndaıtyn basqa da operatsııalardy erkin júzege asyrýǵa múmkindik beredi», - dedi Tamara Dúısenova.