Shetel ınvestorlary keńesi el ekonomıkasyna eleýli úles qosyp otyr
ASTANA. QazAqparat - Shetel ınvestorlary keńesi 1998 jyly Qazaqstanda ınvestıtsııalyq ahýaldy jaqsartý jáne ınvestorlardyń Qazaqstandaǵy ınvestıtsııalyq qyzmetine qatysty týyndaǵan ózekti máselelerdi tıimdi sheshý úshin Qazaqstan Úkimeti men sheteldik ınvestorlar arasynda tikeleı dıalogty qamtamasyz etý maqsatynda qurylǵan.
Shetel ınvestorlary keńesi quramyna 35 iri transulttyq sheteldik kompanııa men halyqaralyq uıym basshylary kiredi. Keńes jumysynyń negizinde elimizdiń ınvestıtsııalyq saıasatynyń negizgi baǵyttaryn aıqyndaý, ınvestıtsııalyq ahýaldy jaqsartý, ınvestıtsııalar týraly normatıvtik-quqyqtyq bazasyn jetildirý, sondaı-aq, ekonomıkany álemdik ekonomıkalyq protsesterge ıntegratsııalaý, sheteldik ınvestıtsııalardy tartý máseleleri sheshimin tabýda.
Investıtsııalyq klımatty jaqsartý boıynsha júrgizilgen jumystardyń nátıjesinde Qazaqstan Dúnıejúzilik banktiń «Bıznes júrgizý jeńildigi» reıtınginde 35-orynǵa ıe boldy. Sońǵy 12 jylda Qazaqstanǵa tartylǵan tikeleı sheteldik ınvestıtsııa 243 mlrd AQSh dollaryn quraǵan. 2016 jyly 20,6 mlrd AQSh dollary tartylypty, bul 2015 jylmen salystyrǵanda 40 paıyzǵa kóp. Investorlar keńesiniń otyrysy bıyl otyzynshy márte ótti.
Shetel ınvestorlary keńesi qurylǵaly plenarlyq otyrystarda shetel ınvestorlary úshin eldegi quqyqtyq rejimdi jaqsartý, Qazaqstannyń sot júıesin jetildirý, shetel jumys kúshin tartý jáne salyq júıesin ońtaılandyrý, Qazaqstannyń ınvestıtsııalyq ımıdjin jaqsartý sııaqty taǵy birqatar máseleler talqylandy.
Bıylǵy jıynǵa 300-den astam qazaqstandyq jáne sheteldik qatysýshy, onyń ishinde shetel tarapynan Keńestiń 30 múshesi men 2 baqylaýshysy, ıaǵnı, halyqaralyq uıymdar men transulttyq kompanııa basshylary, sondaı-aq, memlekettik organdardyń, ulttyq kompanııalar men uıymdardyń basshylary qatysty. Keńes jańa qurammen tolyqty Otyzynshy otyrys elimizde ótip jatqan «Astana EKSPO-2017» halyqaralyq kórmesimen dóp kelip otyr. Sondyqtan onyń taqyryby da EKSPO-men úndestirilip «Jańa energetıka» dep ataldy.
Keńes otyrysyn Qazaqstan Respýblıkasynyń Prezıdenti Nursultan Nazarbaev ózi ashyp, júrgizip otyrdy. «Bıyl keńestiń qurylǵanyna 19 jyl tolyp otyr. Osy ýaqytqa deıin bizdiń kezdesýimiz jaqsy dástúrge aınaldy. Biz biraz jumysty birge atqardyq. Sizder Qazaqstan ekonomıkasynyń qalyptasýyna jáne biz júrgizip jatqan reformalardy júzege asyrýǵa úlken kómek kórsettińizder. Bizdiń kezdesýlerimiz óte ózekti taqyryptar: ekonomıkany damytýdyń máseleleri talqylanatyn alańǵa aınaldy. Keńeske elimizde jumys isteıtin iri sheteldik kompanııalardyń músheleri kiredi. Jyl ótken saıyn olardyń qatary jańaryp otyr», dedi Elbasy. Memleket basshysy odan ári shetel ınvestorlar keńesiniń jańa múshelerimen tanystyrdy. Elbasynyń aıtýynsha, Qazaqstan tarapynan da keńeske jańa músheler kirgen. «Negizgi taqyryptardy talqylamas buryn men sizderge keńestiń jańa múshelerin tanystyrǵym keledi. Ol Azııalyq damý bankiniń vıtse-prızıdenti Dıvakara Gýpta, «Morebenı korpareıshın» kompanııasynyń Eýropa, Afrıka jáne TMD memleketteri boıynsha aǵa jergilikti atqarýshy ofıtser Naoıa Ivashıta. Olar zeınetke shyqqan áriptesterin almastyrdy. Sondaı-aq, kadrlyq ózgeristerge baılanysty Qazaqstan tarapynan da keńeske jańa músheler kirdi», dedi N.Nazarbaev.
Sondaı-aq, jıynǵa qatysyp jatqan azamattarǵa alǵys aıtyp, keńes otyrysy EKSPO-2017 halyqaralyq kórmesiniń aýmaǵynda ótip jatqanyn eske salyp ótti. Bul rette kórmeniń Qazaqstan úshin mańyzdylyǵyn taǵy da tilge tıek etti.
Investıtsııaǵa ıkemdi el Keńes otyrysynda ınvestıtsııalyq ahýaldy jaqsartý boıynsha Qazaqstan qolǵa alynǵan jumystar jóninde Investıtsııalar jáne damý mınıstri Jeńis Qasymbek jan-jaqty baıandady.
Derekke súıensek, búginde jalpy somasy shamamen 50 mlrd dollar bolatyn júzege asyrylyp jatqan jáne qarastyrylý barysyndaǵy 147 jobanyń tizimi jasaqtalǵan. Investıtsııalar jáne damý mınıstri elimizde qurylyp jatqan «Astana» halyqaralyq qarjy ortalyǵynyń jumysyna da toqtaldy. AHQO bırjasyn qurý boıynsha jumys aıaqtalyp jatqanyn, jahandyq bırjalyq kóshbasshylar sanynan strategııalyq áriptester aıqyndalǵanyn atap ótti.
Jıynda sondaı-aq, Eýropa qaıta qurý jáne damý bankiniń prezıdenti Ser Sýma Chakrabartı, Energetıka mınıstri Qanat Bozymbaev, «Qazaqstandyq shetel ınvestorlary keńesi» qaýymdastyǵynyń Basqarma tóraǵasy Ýlf Vokýrka, «GE Oil & Gas» kompanııasynyń prezıdenti Lorentso Sımonellı, «ENI S.p.A.» kompanııasynyń Bas atqarýshy dırektory Klaýdıo Deskaltsı, Birlesip qarjylandyrý jáne jeke sektor operatsııalary jónindegi Azııa damý bankiniń vıtse-prezıdenti Dıvakara Gýpta, «ERG S.a.r.l.» kompanııasy dırektorlar keńesiniń tóraǵasy Aleksandr Mashkevıch jáne basqalar sóz sóıledi. Jańa energetıkaǵa jol Otyrysty Qazaqstan Prezıdenti N.Nazarbaev qorytyndylady.
