Shetel dıplomatııalyq korpýsy Qazaqstanda turaqty túrde tegin donorlyq kómek kórsetip turady
ASTANA. 14 maýsym. QazAqparat - Shetel dıplomattary qazaqstandyqtardyń ómirin saqtaý úshin óz erikterimen qan tapsyrýdy daǵdyǵa aınaldyrǵan.
Bul týraly búgin Astanadaǵy "Qan ortalyǵynda" Dúnıejúzilik donorlar kúnine arnalǵan sharada Dúnıejúzilik densaýlyq saqtaý uıymynyń Qazaqstandaǵy ókili Melıta Výınovıch málim etti.
Onyń aıtýynsha, sheteldik elshilikterdiń jetekshileri men qyzmetkerleri Astanada turaqty túrde qan tapsyryp turady eken. Degenmen búgin birqatar dıplomatııalyq mıssııa ókilderiniń deni ózderiniń bul adal isin jarııa etkisi kelmegendikten sharaǵa qatysqan joq.
"Qazaqstanda tegin donorlyq ınstıtýtty belsendi damytý qajet. Sebebi qannyń qajetti qoryn tek óteýsiz donorlardyń kúndelikti qan tapsyrýynan ǵana jınaqtaýǵa bolady. Atap ótkim keledi, Qazaqstan Respýblıkasynda ornalasqan dıplomatııalyq mıssııalardyń jetekshileri men qyzmetkerleri osy elde tegin donorlar bolyp tabylady. Olardyń ishinen Serbııa Elshisi men onyń orynbasaryn, Mıgratsııa jónindegi halyqaralyq mıssııanyń basshysyn, Frantsııa, Shvetsııa, OAR Elshilerin aıta alamyn", - deıdi M.Výınovıch.
"Dúnıejúzilik densaýlyq saqtaý uıymy qazaqstandyq áriptesterimen jáne Qan ortalyǵymen kóp jyldar boıy birge jumys jasap keledi. Men búgin barlyq medıtsına qyzmetkerleri men donorlardy Dúnıejúzilik donor kúni meresimen quttyqtaımyn", - dep atap ótti M.Výınovıch.
Sharaǵa donorlar, medıtsına qyzmetkerleri, dıplomatııalyq korpýs ókilderi men qoǵamdyq uıymdar, baıkerler jáne jas veloshabandozdar qatysty.
