Shetel bankteriniń kelýinen tutynýshy paıda kórýi kerek – qarjy sarapshysy
«Bank – qarjylyq deldal. Bankter bizdiń naryqty óte jaqsy biledi. Elimizge keletin sheteldik bankter tek korporatıvtik nesıelendirýde óz ornyn taba alady. Eger iri bankter bolsa jáne olar elderde bolatyn qarjy táýekelderin qabyldaýǵa daıyn bolsa, onda Qazaqstanda jumys istesin», - dedi Rasýl Rysmambetov agenttik tilshisine bergen suhbatynda.
Odan ári maman shetelden keletin bankterdiń jumys isteý mehanızmderi týraly aıtyp berdi.
«Bul degenimiz Qazaqstan naryǵyna 3 bank jaı ǵana keledi degen sóz emes. Meniń túsingenim, olar «Bereke» banktiń nemese Jýsan banktiń belgili úlesin satyp alady. Qazaqstanda kem degende 2-3 bankti satýǵa daıyndap jatqanyn bilemin jáne bul Prezıdenttiń aıtqanymen sáıkes keledi. Bizdiń bankter básekelestikke tótep bere alady. Buǵan kúmánim joq, kez kelgen jaǵdaıda tutynýshy odan paıda kórýi kerek, meniń oıymsha, solaı bolady da», - deıdi ol.
Sondaı-aq sarapshy bıznes úshin esep berýdi jeńildetý máselesin kóterdi.
«Men ózim jeke sektordanmyn. Ár toqsan saıyn býhgalterııaǵa birese myna forma, kelesi joly basqa formamen toltyr dep talap etedi. Sonymen qatar esep formasynyń ishinde bos baǵandar kóp. Ol málimetterdiń bári óńdeledi, taldanady, bul kásiporyndardyń tıimdiligin anyqtaý úshin qajet. Biraq salyqtardy basqarý tek memlekettik organdar úshin ǵana emes, bıznes úshin de óte qıyn. Sondyqtan qaǵaz toltyrýdy azaıtyp, elektrondy formatqa kóshkimiz keledi. Alaıda menimshe, bul jerde problema bar, elimizde derekterdi óńdeý ortalyqtary jetispeıdi. Osy oraıda biz tsıfrlyq ekonomıkaǵa bet buramyz desek, derekterdi óńdeý ortalyqtaryn kóbirek ashyp, jalpy protsesti jeńildetý qajet. Keıbir bankter mıkro jáne shaǵyn bıznes úshin esepti tez toltyrýdyń qarapaıym jolyna kóshti. Osyǵan baılanysty salyq organdarynyń áreketin kútemiz», - dep tolyqtyrdy Rasýl Rysmambetov.