Shetel azamaty Qazaqstanǵa minip kelgen sheteldik kólikti satyp alýǵa bola ma

ASTANA. QazAqparat – Ákimshilik polıtsııa komıteti tóraǵasy orynbasarynyń mindetin atqarýshy Álibek Keńispaev shetel azamaty Qazaqstanǵa minip kirgen sheteldik kólikti satyp alý tártibin túsindindirdi, dep habarlaıdy QazAqparat tilshisi.

«Siz aıtyp otyrǵan Grýzııa, Birikken Arab Ámirlikteri sııaqty úshinshi elderden (Eýrazııalyq ekonomıkalyq odaqqa múshe emes elderdiń bári – red) shetel azamaty Qazaqstanǵa sheteldik kólikti minip kirse, Kedendik kodeks aıasynda deklarant retinde ıelik ete alady. Olar bul kólikti Qazaqstan aýmaǵynda bir jyl boıy mine alady», - dedi ol.

Onyń aıtýynsha, ınternettegi habarlamada Qazaqstan azamattardy mundaı kólikti bir jyl boıy tranzıttik nómirmen mine alatyny aıtylǵan aqparat negizsiz.

«Mundaı quqyq tek sheteldik azamatqa, deklarantqa beriledi. Bul kólikter Qazaqstan aýmaǵynda Qazaqstan azamattarynyń basqarýyna berile almaıdy. Sondyqtan ondaı kólikti Qazaqstan azamaty satyp alǵan jaǵdaıda tolyqqandy miný úshin kedendik tazartýdan tolyqqandy ótkizýi kerek. Bastapqy esepke qoıyp, bastapqy tirkeý alymyn jáne ýtılalym tóleıdi. Osydan keıin Qazaqstan aýmaǵynda qazaqstandyq nómirmen, tıisti tirkeý qujattarymen mine alady», - dedi ol.