Shetel azamaty Aqmola turǵynynyń atyna 1 mln teńge nesıe rásimdegen

KÓKShETAÝ. QazAqparat - Shetel azamaty AnyDesk arqyly Aqmola oblysynyń turǵynyna 1 mıllıon teńge nesıe rásimdegen, dep habarlaıdy QazAqparat tilshisi.

Aqmola oblystyq polıtsııa departamentiniń málimetinshe, PD krımınaldy polıtsııa basqarmasy men bólimsheleriniń qyzmetkerleri «Hi-Tech» respýblıkalyq jedel-aldyn alý is-sharasy aıasynda aqparattyq tehnologııalardy paıdalana otyryp jasalǵan qylmysty ashty.

«Aqkól aýdandyq polıtsııa bóliminiń kezekshilik bólimine 49 jastaǵy jergilikti turǵyn júgindi. Onyń sózinshe, qyrkúıektiń 8-de beıtanys adam oǵan ózin qaýipsizdik qyzmetiniń qyzmetkeri retinde tanystyrǵanyn jáne AnyDesk qashyqtan qol jetkizý baǵdarlamasyn paıdalana otyryp, onyń atyna jalpy somasy 1 mln teńge nesıe resimdegen», - dep tolyqtyrdy vedomstvodan.

Jedel-izdestirý is-sharalary barysynda Nur-Sultan qalasynda Reseı Federatsııasynyń Qylmystyq kodeksiniń 111-shi baby 1-bóligi boıynsha qylmystyq jaýapkershilikke tartylǵan 39 jastaǵy Tatarstan Respýblıkasynyń turǵyny ustaldy.

«Osyǵan baılanysty Aqmola oblysy PD tergeý basqarmasy Qylmystyq kodekstiń 190-shy babynyń 2-bóligi «Alaıaqtyq» boıynsha sotqa deıingi tergeýdi bastady. Kúdikti ýaqytsha ustaý ızolıatoryna qamaldy», - dep tolyqtyrdy vedomstvodan.