Shetel azamattary Qazaqstan aýmaǵynda júrip-turý quqyǵyn qaıta zańdastyrýy tıis
«2021 jylǵy 5 maýsymda shetel azamattarynyń Qazaqstan Respýblıkasynyń aýmaǵynda ýaqytsha bolý merzimi aıaqtalady. Atalǵan merzim vedomstvoaralyq komıssııanyń (VAK) 2020 jylǵy 29 jeltoqsandaǵy sheshimimen pandemııaǵa baılanysty uzartylǵan bolatyn. Qazirgi ýaqytta Qazaqstan Respýblıkasynyń memlekettik shekarasy arqyly qurlyqtaǵy jáne avıatsııalyq ótkizý beketteri shtattyq rejımde jumys isteıdi. Sondaı-aq, búginde 15 memleketpen (Reseı Federatsııasy, Belarýs Respýblıkasy, Qyrǵyzstan Respýblıkasy, Ózbekstan Respýblıkasy, Tájikstan Respýblıkasy, Koreıa Respýblıkasy, Ýkraına, Túrkııa, Egıpet, Germanııa, Birikken Arab Ámirlikteri, Nıderlandy Koroldigi, Grýzııa, Chernogorııa, Shrı-Lanka) turaqty áýe qatynasy qaıta jańartyldy», - dedi Muńdash Mollashev atalǵan vedomstvoda onlaın ótken baspasóz máslıhatynda.
Onyń aıtýynsha, Qazaqstan aýmaǵyna 101 shekaralyq beket arqyly kirýge bolady.
Onyń ishinde avtomobıl jolaýshylaryna arnalǵan 51 beket, 19 áýe jáne 3 teńiz beketi qyzmet etedi.
Sondaı-aq, ol karantın shekteýlerine baılanysty búginde 12 bekettiń qyzmeti ýaqytsha toqtatylǵanyn tilge tıek etti.
«Ulttyq qaýipsizdik komıtetiniń shekara qyzmeti sheteldikterdi azamattyǵy bar elge kedergisiz qaıtarý boıynsha sharalar qabyldaýda. Atap aıtqanda, karantındik shekteýler kezinde, onyń ishinde onlaın formatta adamdardyń elden shyǵý tártibin túsindirý uıymdastyryldy. Osy oraıda ákimshilik jaýapqa tartylmas úshin sheteldikter men olardy shaqyratyn adamdarǵa Qazaqstan aýmaǵynda odan ári júrip-turýdy 5 maýsymǵa deıin zańdastyrý qajettigin eskertkimiz keledi», - deıdi ol.
