Shetel azamattaryna medıtsınalyq kómek qalaı kórsetiledi
ASTANA. KAZINFORM – Eýrazııalyq ekonomıkalyq forýmnyń «Tsıfrlyq quraldardy paıdalana otyryp, EAEO eńbek resýrstary naryǵyn damytý» taqyrybyndaǵy sessııasy sheńberinde QR Densaýlyq saqtaý mınıstrligi Apparatynyń basshysy Bolat Tókejanov zamanaýı kóshi-qon úderisterin, sanıtarııalyq-epıdemıologııalyq qaýipsizdikti jáne eldiń halyqaralyq mindettemelerin eskere otyryp, shetel azamattary men eńbek mıgranttaryna medıtsınalyq kómek kórsetý júıesin jetildirý týraly baıandady.
Ol ózge memleketterdiń azamattary úshin medıtsınalyq kómektiń qoljetimdiligi týraly aqparat berdi.
– Elimizdiń aýmaǵynda turaqty turatyn sheteldikter, qandastar jáne bosqyndar densaýlyq saqtaý salasynda qazaqstandyqtarmen teń quqyqqa ıe. Olar tegin medıtsınalyq kómektiń kepildik berilgen kólemine, MÁMS qyzmetterine, medıtsınalyq-sanıtarııalyq alǵashqy, mamandandyrylǵan jáne statsıonarlyq kómekke qol jetkize alady. Sheteldik jumyskerler úshin mindettelgen medıtsınalyq saqtandyrý júıesi qoldanylady. 2025 jyldyń qorytyndysy boıynsha elde osyndaı saqtandyrýdyń shamamen 550 myń sharty jasaldy, – dedi ol.
Bolat Tókejanov sondaı-aq quqyqtyq mártebesine qaramastan Qazaqstandaǵy barlyq shetel azamattaryna shuǵyl medıtsınalyq kómek kórsetiletinin, al aınaladaǵylarǵa qaýip tóndiretin aýrýlarǵa erekshe nazar aýdarylatynyn atap ótti.
Sóz sońynda ol Densaýlyq saqtaý mınıstrligi shetel azamattary úshin mindetti jáne belgilengen medıtsınalyq saqtandyrý tetikterin jetildirý boıynsha turaqty jumys júrgizip jatqanyn, bul rette gýmanıtarlyq qaǵıdattar, adam quqyqtaryn qorǵaý jáne halyqtyń sanıtarııalyq-epıdemıologııalyq qaýipsizdigi arasyndaǵy teńgerim qamtamasyz etiletinin aıtty.
Aıta keteıik, Almatyda Balalardy qorǵaý kúnine oraı tegin medıtsınalyq tekserýden ótýge bolady.
