Shet memleketterdegi birqatar qalada referendým ýchaskeleri jumysyn bastady
Japonııa men Koreıa Respýblıkasynda turatyn Qazaqstan Respýblıkasynyń azamattary elimizdiń Konstıtýtsııasyna ózgerister men tolyqtyrýlar engizý jónindegi jalpyulttyq referendýmda ózderiniń daýys berý konstıtýtsııalyq quqyǵyn alǵashqylardyń biri bolyp paıdalandy.
Tokıo qalasyndaǵy referendým ýchaskesinde daýys bergen alǵashqy qazaqstandyq jaqynda 18 jasqa tolǵan jas saılaýshy Alıjan Salıev boldy. Bul onyń alǵashqy saılaýy jáne ol osy óziniń quqyǵyn qýana júzege asyrdy.
«Men jaqynda 18 jasqa toldym jáne osyndaı tarıhı oqıǵaǵa alǵash ret qatysý men úshin óte qyzyqty. Oǵan qosa bul úlken jaýapkershilik, óıtkeni meniń daýysym da Konstıtýtsııany jańartýda eskeriletin bolady. Men Qazaqstannyń Japonııa sııaqty damyǵan elge aınalǵanyn qalaımyn», - dedi Alıjan.
Ońtústik Koreıa astanasyndaǵy № 258 ýchaskege alǵash bolyp qazaqstandyq otbasy Kákim Danabaev pen Arýna Jánibek keldi. Olar Seýlde 10 jyldan astam ýaqyt turyp, bıznespen aınalysady.
«Men koreı seriktesterimmen bıznes júrgizemin. Olardyń óz elindegi jaǵdaıdy qalaı talqylaıtyndaryn, saıası ómirge belsendi qatysatynyn jıi kóremin. Sondyqtan sońǵy 10 jyl ishinde men birde-bir saılaýdy ótkizip alǵan joqpyn. Bul joly da óz daýysymdy berýge keldim, óıtkeni referendýmǵa qatysý bizdiń azamattyq paryzymyz. Bizdiń daýysymyz - balalarymyzdyń bolashaǵy», - dedi kásipker.
