Shet memleketke ketken azamattar balasynyń aldyndaǵy jaýapkershilikten qutylmaıtyn bolady - B. Beknazarov
ASTANA. QazAqparat - Shet memleketke ketken azamattar balasynyń, otbasynyń aldyndaǵy jaýapkershilikten qutylmaıtyn bolady. Bul týraly búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda senator Bektas Beknazarov málim etti.
Otyrys barysynda «Balalarǵa alımentterdi jáne otbasyn kútip-baǵýdyń basqa da nysandaryn óndirip alýdyń halyqaralyq tártibi týraly konventsııany ratıfıkatsııalaý týraly» zań jobasy talqylanǵan bolatyn.
«Konventsııa Qazaqstan tarpynan qoldaý tabýy tıis dep esepteımin. Biz qazir áldeqaıda keńeıtilgen, jahandanǵan álemde ómir súrip jatyrmyz. Qazaqstannyń talaı azamattary basqa shet memleketterge kóship jatyr. Osyndaı jaǵdaıda olardyń kámeletke tolmaǵan jas balalary bizde qalady. Basqa memelketterden Qazaqstanǵa kelip jatqan azamattar da bar. Bizge berilgen málimetter boıynsha qazir Qazaqstanda 270 myńnan astam osyndaı oryndaý qujattary qarastyrylǵan eken. Sondyqtan da, Qazaqstan osy konventsııaǵa qosylǵan 32 memleket jáne Eýropalyq Odaqpen yntymaqtasatyn bolady», - dedi B.Beknazarov.
Onyń aıtýynsha, jasy kámeletke tolmaǵan balalar meıli ol Qazaqstanda, meıli basqa shet memleketterde bolmasyn ata-anasynyń kómegin kórýi qajet. «Basqa shet memleketke ketip qalǵan azamattar úshin óz balalary aldyndaǵy jaýapkershilikten qutylyp ketpeýi kerek. Sondyqtan da, Konventsııa dál osyndaı máseleni, onymen aınalysatyn memlekettik organdar arasyndaǵy yntymaqtastyqty kúsheıtetin bolady», - dedi senator.
