Shet elge shyqqandar qandaı indetten qorǵanýy tıis
ASTANA. QazAqparat - Tutynýshylardyń quqyqtaryn qorǵaý komıteti shet memleketke demalysqa nemese jumys saparymen baratyndar úshin jadnama jarııalady, dep habarlaıdy QazAqparat.
«Birinshiden, qazir respıratorly vırýstyq aýrýlar maýsymy. Ásirese, «ishek» tumaýy epıdemııasy órship turǵan Ońtústik Koreıa men Japonııada aptasyna 70 myń oqıǵa tirkeledi. Koronavırýstar boıynsha da epıdemıologııalyq ahýal saqtalýda. Koronavırýs ınfektsııalaryn juqtyrý oqıǵalary Katarda, Birikken Arab Ámirlikterinde, Saýd Arabııasy men Ońtústik Koreıada (aýrýhanaishilik juqtyrý oqıǵalary) tirkeldi. Búkilálemdik densaýlyq saqtaý uıymynyń aqparatyna sáıkes, zerthanalyq túrde rastalǵan indet juqtyrýdyń 652 oqıǵasy ólimge ákep soqqan», - delingen habarlamada.
Taıland, Sıngapýr, Vetnam, Úndistan jáne Fılıppınge sapar shegýdi josparlaǵandar bul elderde Denge bezgegi ýshyǵyp turǵanyn eskergen jón. Brazılııada Zıka bezgeginiń taralýy jalǵasýda, 351 adam kóz jumdy, AQSh-ta syrttan ákelingen 4 myń oqıǵa, Florıda shtatynda jergilikti paıda bolǵan - 50 jáne Ispanııada 190 fakti anyqtaldy.
AQSh-ta epıdemııalyq parotıttiń órshýi (mysqyl, 5 myńnan astam oqıǵa) tirkeldi, bul vaktsınatsııa jasatpaǵan azamattar úshin qaýipti. Domınıkana respýblıkasy men Gaıtıden dıfterııa tabylyp otyr. Shotlandııada qyzylsha aýrýy órship tur, indetti Reseıde - 86, al Tájikstanda 16 adam juqtyrǵan.
Qoǵamdyq tamaqtaný oryndaryna barǵanda jáne azyq-túlik satyp alýda saqtyq tanytqan jón. Tipti AQSh pen Anglııa sekildi damyǵan elderde qoǵamdyq tamaqtaný jerlerinde astan ýlaný oqıǵalary bolyp turady. Amerıkaǵa baratyn týrısterge salmonella tabylǵan TreeHouse Foods Inc, Mac, Wal-Mart kompanııalarynyń azyq-túlik ónimderin (irimshikter, qytyrlaq kartop, júgeri tortılııasy, qurǵaq sút pen irkit untaǵy) satyp almaýǵa keńes beremiz.
