Shet eldik arnalardyń Qazaqstan keńistigindegi aqparat taratý quqyǵy zańdy túrde rettelýi tıis - Ilıa Pýstogachev

Bul týraly óz pikirin BNews aqparat agenttigi ótkizgen «Qazaqstandyq televızııanyń damýy» taqyrybyndaǵy onlaın-konferentsııa barysynda «Astana qalasynyń televızııasy» JShS bas dırektorynyń birinshi orynbasary Ilıa Pýstogachev bildirdi.

Onlaın-konferentsııa barysynda Qazaqstannyń aqparat naryǵynda bolyp jatqan ózgerister men jańa betburystar sóz boldy, qazirgi tańdaǵy qazaq televızııasynyń ózekti máseleleri talqylanyp, QR «Teleradıo habar taratý týraly» Zań jobasyna qatysty pikirler ortaǵa salyndy.

Ilıa Pýstogachevtyń aıtýynsha, birneshe keleli máseleler qolǵa alynýy qajet. Birinshiden, Qazaqstannyń aqparat keńistiginde kabeldik júıeler arqyly habar taratyp jatqan ózge eldiń arnalary arnaıy aqparat taratý quqyǵyna qol jetkizbeı-aq jumys jasap jatyr. Bul zańdy turǵydan naqty rettelýi tıis, shet eldik arnalar arnaıy tirkeýden ótýi qajet.

Ekinshiden, Qazaqstan keńistiginde orys tili keń taralǵandyqtan orys tildi arnalar qazaq tiline aýdarma jasamaı-aq habar tarata beredi. Al bundaı arnalar arnaıy tirkeýden ótip, Qazaqstannyń aqparat keńistiginde habar taratý quqyǵyn zańdy túrde alyp, qazaq tiline aýdarma jasasa artyq bolmas edi.

Úshinshiden, kabeldik júıeler arqyly aqparat taratatyn arnalar Qazaqstandaǵy alkogoldi ishimdikterdi jarnamalamaý turǵysyndaǵy zańdy eskere bermeıdi. «Mysaly, Reseıde alkogoldi ishimdikterdi jarnamalaýǵa tyıym salynbaǵan. Reseılik arnalar óz eliniń zańy boıynsha jumys isteıdi. Al kabeldik operatorlar biz tek qana «retranslıatsııa» jasadyq degendi alǵa tartady da, eshkim jaýapkershilikti óz moınyna almaıdy. Nátıjesinde qazaqstandyq zań saqtalmaıdy», - dep negizgi máselelerge toqtaldy Ilıa Pýstogachev konferentsııa barysynda.

Búgingi Onlaın-konferentsııaǵa qatysty tolyq aqparatty www.bnews.kz saıtynan alýǵa bolady.