Shet elderden Qazaqstanǵa ákelingen 578,83 tonna ónim keıin qaıtaryldy

ASTANA. QazAqparat - 2017 jyldyń qarasha aıynyń 3-10 aralyǵynda qujat tekserý barysynda Qazaqstan Respýblıkasynyń aýmaǵyna joǵary fıtosanıtarııalyq qaýpi bar karantınge jatqyzylatyn ónimderdi ákelý kezinde Qazaqstan Respýblıkasy jáne Eýrazııalyq ekonomıkalyq odaǵynyń ósimdikter karantıni salasyndaǵy zańnamalyq buzýshylyqtyń 53 faktisi anyqtaldy. 

Bul týraly QR Aýyl sharýashylyǵy mınıstrliginiń baspasóz qyzmeti habarlady.

 Reseı Federatsııasynan 19 jaǵdaıda (kartop - 1,4 tonna, alma - 3 tonna, apelsın, mandarın, ananas, lımon - 17,15 tonna, kúnbaǵys tuqymdary - 22 tonna, bıdaı - 102 tonna, aǵash daıyndamalary - 72 tekshe metr, kesilgen aǵash daıyndamalary - 160 tekshe metr) mindetti ilespe fıtosanıtarııalyq sertıfıkatsyz ákelingen. Onyń ishinde, 2 jaǵdaıda salmaǵy 20 tonna kartop óniminde - kartoptyń altyn tústes jumyrqurty jáne salmaǵy 19,85 tonna pııaz óniminde - aram soıaýlar atty karantındik obektiler anyqtaldy.
Ózbekstan Respýblıkasynan 3 jaǵdaıda jalpy salmaǵy 21,02 tonna qurma jáne anar ónimderinde - Komstok symyry atty karantındik obekt anyqtaldy.

 Qyrǵyzstan Respýblıkasynan 30 jaǵdaıda ákelingen kelesi ónimder respýblıka aýmaǵyna markırovkasyz (alma - 21,825 tonna, kúrish - 23,08 tonna, asqabaq tuqymy - 0,8 tonna, almurt - 5,05 tonna, jańǵaq - 8,35 tonna, burshaq - 22 tonna, banan - 1,2 tonna) jáne mindetti ilespe fıtosanıtarııalyq sertıfıkatsyz (qurma - 3,4 tonna, alma - 1,1 tonna, kúrish - 0,08 tonna) ákelingen.

 Sondaı-aq, jalpy salmaǵy 218,165 tonna keptirilgen jemister, qurma, alma, júzim, almurt, jańǵaq ónimderinde karantındik obektiler - Komstok symyry, aram soıaýlar, shyǵys jemis jemiri anyqtaldy.

 Qytaı Halyq Respýblıkasynan salmaǵy 69,16 tonna sulý jarmasy jaramsyz fıtosanıtarlyq sertıfıkatpen ákelingen.
Zańbuzýshylyqqa jol bergen ónim ıeleri ákimshilik jaýapkershilikke tartyldy. Joǵaryda kórsetilgen karantınge jatqyzylatyn ónimderdiń jalpy salmaǵy 578,83 tonna jáne 232 tekshe metr eksporttaýshy memleketterdiń aýmaǵyna qaıtaryldy jáne 1,8 tonna ónim joıyldy.