Shet elderdegi qazaq dıasporalarynyń balalary Astanada qazaq tili men ádebıetinen halyqaralyq olımpıadaǵa qatysýda
ASTANA. 25 maýsym. QazAqparat - Astana qalasynda «Qazaqstan - ata jurtym, qasıetim - ana tilim» atty qazaq tili men ádebıeti páninen X halyqaralyq olımpıadasy ótýde.
Oǵan álemniń túkpir-túkpirindegi qazaq dıasporalarynyń 100-ge tarta mektep oqýshylary qatysýda. Olımpıadany QR Bilim jáne ǵylym mınıstrligi «Daryn» respýblıkalyq ǵylymı-praktıkalyq ortalyǵy shet memleketterde turatyn otandastardy qoldaý týraly memlekettik baǵdarlamasy aıasynda ótkizýde.
«Ana tildi qasıet tutpaǵan jerde táýelsizdigimiz eshqashan baıandy bola almaıdy. Osy maqsatta biz sheteldegi qandastarymyzdyń arasynda qazaqtyń tili men ádebıetinen jyl saıyn emtıhan ótkizýdi dástúrge aınaldyrdyq. Álemniń ár túkipirinen nebir dúl-dúl, sheshen, tilin qasıet tutqan, atajurtym - Qazaqstan dep tanyǵan balalar kelip qatysyp jatady», - dedi sharanyń saltanatty ashylý rásimi barysynda Olımpıadanyń qazylar alqasynyń qurmetti tóraǵasy, fılologııa ǵylymdarynyń doktory, akademık, Halyqaralyq qazaq tili qoǵamynyń prezıdenti Ómirzaq Aıtbaıuly.
Onyń aıtýynsha, olımpıadanyń júldegeri atanǵan jastar joǵary oqý oryndarynda bilim alyp, atajurtynyń damýyna óz úlesterin qosyp júr. Dástúrli olımpıadaǵa on jyl ishinde júzdegen mektep oqýshylary elordadan bastap, qasıetti qazaq jeriniń on óńirinde boldy.
Erejege sáıkes olımpıadaǵa 9-11 (12) synyp oqýshylary qatysa alady. Qatysýshy-memleketterdiń árbir komandasy 6 oqýshy men 1 jetekshiden quralýy tıis.
