Shet elderde shamamen 2 myńǵa jýyq Qazaqstan azamaty sottalyp, jazasyn óteýde - I. Merkel

ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasy men Majarstan arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy.

Atalǵan kelisim ýaǵdalasýshy taraptardyń azamattaryn ózderi azamaty bolyp tabylatyn memlekette jazasyn odan ári óteý úshin berý máselelerin retteýge baǵyttalady. Sonyń ishinde tulǵalardy berýde ol sol eldiń azamaty bolýy jáne oǵan jasalǵan úkim naqty kúshine engen bolýy shart. Eger ýaǵdalasýshy taraptardyń biri ondaı ustap berý el egemendigine, qaýipsizdigine, qoǵamdyq tártipke zalalyn tıgizedi dep sanaıtyn bolsa, onda ustap berýden bas tartylýy múmkin.

«Shet elderde meniń bilýimshe, aǵymdaǵy jyldyń 1 qańtaryndaǵy jaǵdaıǵa sáıkes, shamamen 2 myńǵa jýyq Qazaqstannyń azamaty sottalǵan bolatyn. Naqtyraq aıtqanda, eger jańylmasam, 1995 adam. Al osy shet elderde sottalǵan Qazaqstan azamatyn qaıtarýǵa kelsek, ol óte kúrdeli úderis. Kóptegen elder buǵan bara bermeıdi. Máselen, Reseımen bizde jeńilirek bolǵanymen, Ózbekstan, Qyrǵyzstan boıynsha qaıtarýǵa qatysty kúrdeli jaǵdaılar barshylyq. Biz ótken aptada bul máseleni joǵary deńgeıde sheshý úshin Ózbekstan tarapyna hat joldadyq. Tutastaı alǵanda, shet elderde sottalǵan 25 qazaqstandyq qaıtarylǵan bolatyn. Sonymen qosa, bir psıhıkalyq aýrýǵa shaldyqqan azamat ta elge ákelindi», - dedi QR Bas prokýrorynyń birinshi orynbasary Iogan Merkel.

Bul rette I.Merkel sottalýshy tulǵanyń Qazaqstanǵa qaıtarylýyna kelisimi de mańyzdy ról atqaratynyn atap ótti.

«Eger ol elde jazasyn óteýdi jalǵastyrýǵa kelisimin bermese, bizdiń qolymyzdan da eshteńe kelmeıdi», - dedi I.Merkel.