Shet elderde 922 Qazaqstan azamaty jazasyn ótep jatyr

NUR-SULTAN. QazAqparat- Parlament Senatynyń jalpy otyrysynda «Qazaqstan Respýblıkasy men Soltústik Makedonııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Sharttyń basty maqsaty – basqa elderde sottalǵan azamattarymyzǵa jazasyn elimizde óteýge múmkindik jasaý. Shartqa sáıkes sottalǵan adamdardy berý úshin: ol adam eki eldiń biriniń azamaty bolýy tıis, eki elde de qylmys bolyp sanalatyn áreket úshin sottalǵan bolýy qajet, suraý alynǵan kezde úkim zańdy kúshine engen bolýy tıis jáne keminde 6 aı óteıtin ýaqyty qalýy tıis, sottalǵan adamnyń jazbasha kelisimi kerek», - dedi QR Bas prokýrorynyń birinshi orynbasary Berik Asylov.

Sottalǵan adam kelesi jaǵdaılarda berilmeıdi:

- eger qylmyskerdi berý el egemendigine nuqsan keltiretin bolsa, ulttyq zańnamaǵa qaıshy kelse;

- adam memlekettik qaýipsizdikke qol suǵatyn qylmys úshin sottalǵan bolsa;

- sottalǵan adam talap qoıý rásimderine tartylǵan bolsa. Mysaly, onyń qylmysy arqyly kelgen shyǵyndy qaıtarý jóninde sot protsesi júrip jatsa.

«Qazirgi kezde eki jaqta da berýge jatatyn sottalǵandar joq. Osyndaı sharttar 21 elmen jasaldy (Ýkraına, Qytaı, Túrkııa, Birikken Arab Ámirlikteri). Bolashaqta 6 elmen (Ózbekstan, Kıpr, Portýgalııa, Perý jáne Domınıkan Respýblıkasy) qol qoıýdy qarastyryp jatyrmyz. Búgingi tańda Qazaqstanda 970 shetel azamaty bas bostandyǵynan aıyrý túrindegi jazasyn ótep jatyr. Al, shet elderde 922 Qazaqstan azamaty jazasyn óteýde. «Halyqaralyq sharttar týraly» Zańǵa sáıkes, Shart ratıfıkatsııalaýǵa jatady. Sebebi, adam quqyqtaryna tikeleı qatysty. Zań jobasy respýblıkalyq bıýdjetten qosymsha qarajat talap etpeıdi», - dedi B. Asylov.