Shet aýdanyndaǵy kún elektr stantsııasynyń qurylysy maýsym aıynda aıaqtalady - Qaraǵandy
QARAǴANDY. QazAqparat - Shet aýdanynyń Aǵadyr aýylyna jaqyn mańydaǵy kún elektr stantsııasynyń qurylysy bıylǵy jyldyń maýsym aıynda aıaqtalady. Bul týraly QazAqparat ákimdiktiń saıtyna silteme jasap habarlaıdy.
Sol ýaqyttan bastap alǵashqy energııa alyna bastaıdy. Qaraǵandy oblysy ákiminiń orynbasary Almas Aıdarov qurylys jumystarynyń barysymen tanysty.
Kún elektr stantsııasy 120 gektar aýmaqty alyp jatyr. Onyń qýattylyǵy 50 MVt quraıdy. Kelisimshartqa saı birinshi elektr energııasy 30 maýsymda óndirile bastaıdy. Qazirgi tańda elektr qýatyna qosylý jumystary júrgizilýde. Jaqyn arada munda 150 myń panel men qýatty qosalqy stantsııalar jetkizilýi tıis.
Almas Aıdarov barlyq qurylys jumystary merziminde aıaqtalýy tıis ekenin atap ótti. Sondyqtan da bar máselelerdi qysqa merzimde sheshý úshin qazirden qaldyrmaı ortaǵa salý kerektigi aıtyldy. Onyń ishinde júk kólikteriniń salmaǵyna shydaı almaýy múmkin kenttegi joldar týraly sóz qozǵaldy.
«Osyǵan deıin mundaı úlken júkter avtokólik arqyly jetkizilmegen edi. Sondyqtan joldarǵa qatysty suraqtar týyndady. Biz olardy jedel sheshemiz», - dedi Qaraǵandy oblysy ákiminiń orynbasary.
Taǵy bir másele - qujattardy rásimdeý. Bul máseleni oblys ákiminiń orynbasary baqylaýda ustaýǵa ýáde berdi. Nemis ınvestorlarynyń aıtýynsha, elektr stantsııasynyń qurylysyn jalǵastyrýǵa esh kedergi joq.
Jobanyń quny - 55 mıllıon eýro. 3-4 jyl ishinde óńirge balamaly energııa salasynda 500 mıllıon dollar tartý josparlanyp otyr.
Shet aýdanyna sapar barysynda oblys ákiminiń orynbasary jergilikti kásipkerlermen kezdesti.
Olar Almas Aıdarovqa aýdanda shaǵyn jáne orta bıznestiń qalaı damyp jatqandyǵy týraly aıtyp berdi.
