Sheshýshi sátte jeńilsem AQSh-tyń, jeńsem Qazaqstannyń ánurany oınalady degen oı kúsh-qýat berdi - Nankın Olımpıadasynyń chempıony
ASTANA. QazAqparat - Sheshýshi sátte jeńilsem AQSh-tyń, jeńsem Qazaqstannyń ánurany oınalady degen oı kúsh-qýat berdi. Bul týraly búgin QR Premer-Mınıstriniń orynbaary Gúlshara Ábdiqalyqovanyń ІІ jasóspirimder Olımpıadasynyń júldegerlerin quttyqtaýy kezinde erkin kúres boıynsha (54 keli) Altyn medal ıelengen Muhamed Qýatbek aıtty.
"Jarystyń barlyq kezeńderi ońaıǵa soqqan joq. Barlyǵynda namysqa tyrysyp, bar kúshimdi salýǵa týra keldi. Al sheshýshi sáttegi beldesýde amerıkalyq balýanmen shyqtym. Eger jeńilsem, AQSh-tyń ánurany oınalady, al eger jeńsem qazaq eliniń ánurany oınalyp, kók baıraǵy jelbireıdi degen namys birinshi orynda turdy. Eń qıyn beldesý de osy boldy. Qazaqtyń namysyn qoldan bermes úshin bar kúshimdi saldym. Qajymuqannyń urpaqtary qandaı ekenin álemge tanytqym keldi jáne sol armanyma jettim dep oılaımyn", - deıdi jas balýan.
Onyń aıtýynsha, aldaǵy jospary boıynsha 2016 jylǵy Brazılııada ótetin Olımpıadaǵa qatysýdy maqsat tutady.
"Qudaı qalasa, 2016 jylǵy, odan keıin 2020 jylǵy Olımpıadalarǵa qatysyp, júldeli oralsam degen nıetim bar", - deıdi M. Qýatbek.
