Sheshimdi qoryqpaı qabyldaý qajet — Antıkor basshysy sheneýnikter jaıly
ASTANA. KAZINFORM — Memlekettik qyzmetshiler tekserýshi organdardan qorqatyndyqtan sheshim qabyldaý barysynda jıi qaýiptenedi.
Bul jaıynda Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı Jibek Joly telearnasynyń «Ýáde» baǵdarlamasyna bergen eksklıýzıvti suhbatynda aıtty.
Onyń aıtýynsha, uzaqqa sozylatyn kelisim rásimi men sheneýnikterdiń batylsyzdyǵy máseleniń sheshilmeı qalýyna alyp keledi. Al qabyldanǵan sharalar ózektiligin joǵaltyp alady.
— Memleket basshysy sheneýnikterdiń sheshim qabyldaý kerektigine, qoryqpaýy tıistigine nazar aýdartty. Árıne, bul turǵydan kelgende shesheýnik kemeline jetken, óz isiniń sheberi bolýy tıis, — dedi Ashat Jumaǵalı.
Agenttik tóraǵasynyń atap ótýinshe, memlekettik qyzmetshi óziniń is-áreketi zań aıasynda bolsa jáne bastamalary ekonomıkalyq tıimdilikke baǵyttalsa, onda qoryqpaı sheshim qabyldaýy qajet.
Jemqorlyq nege tyıylmaı tur
Antıkor basshysy para berý men alýǵa qatysty ahýalǵa oraı da pikirin bildirdi. Onyń paıymynsha, para berýdi dástúrge aınalǵan deýge bolmaıdy. Biraq, bul másele áli de bolsa ózektiligin joıǵan joq. Máselen, 2024 jyly agenttik 87,7 mlrd teńge bıýdjet qarajatynyń urlaýyna jol bermedi.
— Para berýge ýáde etý nemese usynýdy qylmysqa jatqyzý máselesi qarastyrylýda. Halyqaralyq sarapshylarymyzdyń usynymyna sáıkes jáne halyqaralyq tájirıbege oraı bul da aıtarlyqtaı tejeýshi faktor bolady, — dedi Ashat Jumaǵalı.
Buǵan deıin Antıkor basshysy elimizdegi tsıfrlyq «boıalǵan» aqsha jobasynyń alǵashqy nátıjesi jaıly aıtyp bergenin jazǵan edik.